«Սևոլի» անձնակազմի անդամները գարեջուր էին խմում՝ ուղևորներին փրկելու փոխարեն

Այս տարվա ապրիլին խորտակված հարավկորեական «Սևոլ» մարդատար լաստանավի անձնակազմի անդամներից մեկը խոստովանել է, որ ալկոհոլ էր օգտագործում փրկարարներին սպասելու ընթացքում: Այդ մասին, ինչպես տեղեկացնում է «Արմենպրես»-ը, սեպտեմբերի 3-ին հաղորդել է Reuters գործակալությունը՝ հղում անելով կորեական ԶԼՄ-ներին:

«Սևոլը» խորտակվել է ապրիլի 16-ին: Ըստ վերջին տվյալների՝ ողբերգության զոհ է դարձել 304 մարդ: Նավի խորտակման գործով ձերբակալվել է շուրջ 20 մարդ՝ «Չոնհեչժին» ընկերության աշխատակիցներ, անձնակազմի անդամներ և նավագնացության կորեական ասոցիացիայի աշխատակիցներ, որոնց կասկածում են անվտանգության կանոնների խախտման և կոռուպցիայի մեջ: Գործի նյութերի համաձայն՝ նավի հրամանատարը, որին ցմահ բանտարկություն է սպառնում, առաջիններից մեկն է լքել խորտակվող նավը:

Ինժեներներից մեկը հայտարարել է, որ ինքն ու իր գործընկերները գարեջուր էին խմում լաստանավի նախասրահում, նախքան օգնություն ստանալը: Նավն այդ ընթացքում շարունակում էր սուզվել: «Մենք մի քիչ խմեցինք, որպեսզի թուլանանք»,- խոստովանել է ինժեները, որը մեղադրվում է անփութության մեջ:

Գործակալության տվյալներով՝ անձնակազմի 15 անդամները, այդ թվում՝ նավի հրամանատարը, դատարանում հայտարարել է, թե կարծում էին, որ ուղևորների տարհանումը փրկարարների գործն է: Նավի հրամանատարը նաև ասել է, որ իրենք չեն ստուգել նավի անվտանգությունը «հաստատված պրակտիկայի շրջանակներում», հաղորդել է ՌԻԱ Նովոստին: