ԵԱՀԿ-ն Կիևից պահանջել է հետաքննել ֆոտոթղթակից Ստենինի զոհվելու հանգամանքները

ԵԱՀԿ-ի՝ մամուլի ազատության հարցերով ներկայացուցիչ Դունյա Միյատովիչը սեպտեմբերի 3-ին կոչ է արել Ուկրաինայի իշխանություններին՝ երկրի արևելքում «Ռոսիա սեգոդնյա» միջազգային լրատվական գործակալության ֆոտոթղթակից Անդրեյ Ստենինի զոհվելու հանգամանքների արագ ու մանրակրկիտ հետաքննություն անցկացնել: Այդ մասին, ինչպես տեղեկացնում է «Արմենպրես»-ը, հաղորդվում է կազմակերպության մամուլի տեղեկագրում:

«Ստենինի մահն Ուկրաինայի արևելքում լրագրողների անվտանգության հետ կապված շարունակվող տագնապալի իրադրության մռայլ հիշեցումն է»,-նշվում է հայտարարության մեջ, որը տարածել է ԵԱՀԿ-ի կենտրոնակայանը:

Հայտարարության մեջ հիշեցվում է, որ Ուկրաինայի արևելքում շարունակվող հակամարտության ընթացքում արդեն զոհվել են լրագրողներ Անատոլի Կլյանը (Ռուսաստանի հեռուստատեսության առաջին ալիք), Իգոր Կորնելյուկը և Անտոն Վոլոշինը (Ռուսաստանի պետական հեռուստառադիոընկերություն), իտալացի ֆոտոլրագրող Անդրեա Ռոկելին և նրա օգնական Անդրեյ Միրոնովը:

«Ես կոչ եմ անում Ուկրաինայի իշխանություններին՝ հետաքննել ԶԼՄ-ների աշխատակիցների սպանության և նրանց վրա կատարված հարձակումների բոլոր դեպքերը, դա անել արագ ու մանրակրկիտ»,- հայտարարել է Միյատովիչը:

Սեպտեմբերի 3-ի առավոտյան «Ռոսիա սեգոդնյայի» գլխավոր տնօրեն Դմիտրի Կիսիլյովը հայտարարել է ՌԴ-ի Հետաքննչական կոմիտեի տվյալների ստացման մասին, որոնք վկայում են, որ գործակալության՝ օգոստոսի սկզբին Ուկրաինայում կորած ֆոտոթղթակից Անդրեյ Ստելինը մոտ մեկ ամիս առաջ զոհվել է Դոնեցկի շրջանում:

Ավտոմեքենան, որով նա մեկնել էր կատարելու խմբագրության առաջադրանքը, գնդակոծվել ու հրկիզվել է ավտոճանապարհին: ՌԴ ՀԿ-ի տվյալներով՝ լրագրողն սպանվել է փախստականների շարասյան վրա ուկրաինացի զինվորականների հարձակման ընթացքում, որը հսկում էին մի քանի աշխարհազորայիններ:

ՌԴ-ի ԱԳ նախարարությունը Կիևից պահանջել է հանգամանորեն հետաքննել Ստենինի՝ վերջին ամիսների ընթացքում Ուկրաինայի արևելքում զոհված ռուսաստանցի արդեն չորրորդ լրագրողի զոհվելու հանգամանքները: Ստենինի զոհվելու կապակցությամբ ցավակցություն են հայտնել ՌԴ-ի նախագահ Վլադիմիր Պուտինը, վարչապետ Դմիտրի Մեդվեդևը և Ռուսաստանի քաղաքական այլ գործիչներ: Իր կողմից Ուկրաինայի ազգային անվտանգության և պաշտպանության խորհուրդը հայտարարել է, որ ուժայինները մեղսակից չեն կատարվածին, հաղորդել է ՌԻԱ Նովոստին: