ՄԱԿ-ում հաշվել են Էբոլայի դեմ պայքարի արժեքը

ՄԱԿ-ի՝ Էբոլա տենդի դեմ պայքարի հարցերով հատուկ համակարգող Դևիդ Նաբարոն հայտարարել է, որ վիրուսի դեմ պայքարում անհրաժեշտ է հատկացնել 600 մլն դոլար: Այդ մասին, ինչպես տեղեկացնում է «Արմենպրես»-ը, սեպտեմբերի 4-ին հաղորդել է Reuters գործակալությունը: Դեռ անցած շաբաթ, Առողջապահության համաշխարհային կազմակերպության հաշվարկների համաձայն, այդ գումարը չէր գերազանցում 490 մլն դոլարը:

Իր հերթին ԱՄՆ-ի առողջապահության և սոցիալական ծառայությունների նախարարությունը 42,3 մլն դոլար կծախսի վիրուսի դեմ փորձարարական պատվաստանյութի ստեղծման համար: Մինչդեռ Կանադան արդեն պատրաստ է ԱՀԿ-ին տրամադրել պատվաստանյութի առաջին նմուշները, բայց դժվարություններ ունի լոգիստիկայի հարցում: Կանադայի առողջապահության նախարարության մամուլի քարտուղար Շոն Անտոնի խոսքով՝ դեղը պետք է սառեցված վիճակում պահպանվի, որպեսզի չկորցնի իր հատկությունները:

Ավելի վաղ «Բժիշկներ առանց սահմանների» կազմակերպության ղեկավար Ջոան Լյուն, ելույթ ունենալով ՄԱԿ-ում, հայտարարել է, որ տենդի տարածումը կհաջողվի կանգնեցնել միայն այն դեպքում, եթե զարգացած երկրներն ավելի շատ մասնագետներ ուղարկեն Արևմտյան Աֆրիկա: Տարածաշրջանի երկրների բարեգործական կազմակերպություններն ու իշխանություններն ի վիճակի չեն ինքնուրույն կանգնեցնել հիվանդության տարածումը, ընդգծել է նա:

Էբոլա տենդի բռնկումն սկսվել է այս տարվա փետրվարին Գվինեայում, ավելի ուշ վիրուսը տարածվել է հարևան Աիեռա Լեոնեում, Լիբերիայում և Նիգերիայում: Օգոստոսի 25-ին հայտնի է դարձել, որ վտանգավոր հիվանդությունը հասել է Կոնգոյի Դեմոկրատական Հանրապետություն և Սենեգալ:

ԱՀԿ-ի վերջին տվյալներով՝ վիրուսն արդեն ավելի քան 1900 մարդու կյանք է խլել, իսկ ընդամենը գրանցված է հիվանդանալու ավելի քան 3,5 հազար դեպք: Միայն անցած շաբաթվա ընթացքում գրեթե 400 մարդ է զոհվել: