Ուկրաինական ճգնաժամը ռազմական լուծում չունի. ԵԱՀԿ ԽՎ-ի նախագահ

Ուկրաինայի հարավ-արևելքում շարունակվող հակամարտությունն անհնարին է կարգավորել ռազմական միջոցներով, անհրաժեշտ է գտնել քաղաքական լուծում: Այդ մասին, ինչպես տեղեկացնում է «Արմենպրես»-ը, ԵԱՀԿ-ի Խորհրդարանական վեհաժողովի նախագահ Իլկա Կաներվան հայտարարել է Ռուսաստանի արտաքին գործերի նախարար Սերգեյ Լավրովի հետ սեպտեմբերի 4-ին Մոսկվայում կայացած մամուլի ասուլիսում: «Մենք այսօր այստեղ ենք եկել ոչ այն բանի հա մար, որ ձեզ ինչ-որ բանի կոչենք կամ համոզենք գործել որոշակի ձևով: Մենք չենք պատրաստվում ինչ-որ գոռոզամիտ կամ ագրեսիվ դիրք բռնել»,- ասել է Կաներվան:

«Մենք բոլորս էլ խիստ անհանգստացած ենք Ուկրաինայի արևելքում և Ռուսաստանի հետ Ուկրաինայի սահմանում իրադրության վատացումից»,- հավելել է նա:

«Համոզված ենք, որ ԵԱՀԿ-ն կարող է և պետք է շատ ավելի ակտիվորեն աշխատի համաեվրոպական անվտանգության ոլորտի համակարգային խնդիրների վրա»,-իր հերթին ասել է Լավրովը:

Ավելի վաղ ՄԱԿ-ի գլխավոր քարտուղար Պան Գի Մունը նույնպես ուշադրություն է դարձրել այն բանի վրա, որ Ուկրաինայի ճգնաժամի ռազմական լուծում գոյություն չունի: «Կարևոր է՝ հասկանալ, որ այդ իրադրության ռազմական լուծում չկա: Քաղաքական լուծման համար քաղաքական երկխոսություն է հարկավոր, դա ավելի ռացիոնալ ճանապարհ է»,- ասել է ՄԱԿ-ի գլխավոր քարտուղարը: Նա նաև հայտարարել է, որ անհանգստացած է Ուկրաինայում տեղի ունեցող իրադարձություններից և կցանկանար խուսափել ճգնաժամի հետագա սաստկացումից, որը «վերաճում է խիստ քաոսային ու վտանգավոր ի րադրության», հաղորդել է ԻՏԱՌ-ՏԱՍՍ-ը: