Ուկրաինայում Boeing-ի աղետի վերաբերյալ նախնական զեկույցը կներկայացնեն սեպտեմբերի 9-ին

Ուկրաինայում Boeing-ի ավիաաղետի հետազոտման վերաբերյալ նախնական արդյունքները կհրապարակվեն սեպտեմբերի 9-ին: Այդ մասին, ինչպես տեղեկացնում է «Արմենպրես»-ը, հայտնել է Նիդեռլանդների Անվտանգության խորհուրդը:

«Նախնական զեկույցը կներկայացվի ժամը 10:00-ին»,- ասված է հաղորդագրության մեջ:

«Զեկույցը կբովանդակի փաստական տեղեկատվություն՝ հիմնված Խորհրդին հասանելի աղբյուրների վրա: Հետագա հետաքննություն անցկացնելու և վերջնական զեկույց կազմելու համար ամիսներ են անհրաժեշտ: Անվտանգության խորհուրդը հույս ունի վերջնական զեկույցը հրապարակել աղետի պահից մեկ տարվա ընթացքում»,- ճշտվում է փաստաթղթում:

Malaysia Airlines ընկերության Boeing 777-ը , որը չվերթ էր իրականացնում Ամստերդամ-Կուալա Լումպուր երթուղով, հուլիսի 17-ին աղետի է ենթարկվել Ուկրաինայի Դոնեցկի մարզում: Օդանավի բոլոր ուղևորներն ու անձնակազմի անդամները՝ թվով 298 մարդ, զոհվել են: Նրանց մեծամասնությունը՝ 196 մարդ, Նիդեռլանդների հպատակներ էին, հաղորդել է ԻՏԱՌ-ՏԱՍՍ-ը: