ՆԱՏՕ-ի գագաթնաժողովում կքննարկեն գլոբալ անվտանգության մարտահրավերները

Ուելսում ՆԱՏՕ-ի գագաթնաժողովի աշխատանքի երկրորդ և եզրափակիչ օրվա գլխավոր իրադարձությունները կդառնան Հյուսիսատլանտյան խորհրդի երկու նստաշրջանները՝ դաշինքի անդամ 28 երկրների ղեկավարների մասնակցությամբ (ժամը 12:30-ին և 16:00-ին), տեղեկացնում է «Արմենպրես»-ը:

Ինչպես ԻՏԱՌ-ՏԱՍՍ-ին հայտնել է դաշինքի ներկայացուցիչը, կքննարկվեն «գլոբալ անվտանգության մարտահրավերները և դաշինքի ադապտացումը ապագայի աշխարհին», սպասվում է նաև «երկու փաստաթղթի՝ կոմյունիկեի և Անդրատլանտյան հռչակագրի» ընդունումը:

Գագաթնաժողովի ամփոփիչ երկու փաստաթղթերից մեկը, ինչպես ենթադրվում է, կբովանդակի ռազմական հատկացումների «2-տոկոսանոց նորմատիվի մատնանշում», որին պետք է հետևեն ՆԱՏՕ-ի բոլոր երկրները: Ընդհանուր առմամբ Հյուսիսատլանտյան խորհրդի նստաշրջանները կոչված են «ընդգծել ԱՄՆ-ի, Կանադայի և Եվրոպայի համագործակցության շարունակման կարևորությունը» ՆԱՏՕ-ի գործունեության համար, նշել է աղբյուրը:

Քննարկվելու են Մերձավոր Արևելքի և Հյուսիսային Աֆրիկայի անկայունությունը, դաշինքի ներուժի զարգացումը, կիբեռանվտանգությունը և այլ հարցեր:

Ծագող մարտահրավերների հետ միասին ղեկավարների ուշադրությունը կբևեռվի «ապագային ՆԱՏՕ-ի ադապտացման» խնդրին, մասնավորապես, Աֆղանստանից զորքերի առաջիկա դուրսբերման և Ուկրաինայի շուրջ իրադրության զարգացման հաշվառմամբ: