ԵԱՀԿ-ն մոնիթորինգ է սկսել Ուկրաինայում. Բուրկհալտեր

Եվրոպայի անվտանգության և համագործակցության կազմակերպությունը վերջին երկու օրվա ընթացքում Ուկրաինա է ուղարկել հրադադարի մոնիթորինգի փորձ ունեցող 59 մասնագետների և այժմ վարձում է նոր դիտորդների: Այդ մասին, ինչպես տեղեկացնում է «Արմենպրես»-ը, սեպտեմբերի 7-ի ուշ երեկոյան հայտարարել է ԵԱՀԿ-ի գործող նախագահ, Շվեյցարիայի արտաքին գործերի նախարար ու նախագահ Դիդիե Բուրկհալտերը:

Նրա հայտարարության մեջ ասված է, որ Ռուսաստան-Ուկրաինա-ԵԱՀԿ եռակողմ շփման խմբի և աշխարհազորի ներկայացուցիչների Մինսկի արձանագրության ստորագրման արդյունքում ստեղծվել է հրադադարի ռեժիմի խախտման և այլ միջադեպերի դեպքում գործողությունների սկզբնական մեխանիզմ:

«Մեխանիզմը կողմերի հետ համագործակցությամբ կճշտվի առաջիկա ժամերի և օրերի ընթացքում»,- նշվում է Բուրկհալտերի հայտարարության մեջ: Նաև քննարկվում է անօդաչու թռչող ապարատների օգտագործումը՝ որպես ԵԱՀԿ-ի մասնակից պետությունների ներդրումը Ուկրաինայում Հատուկ դիտորդական առաքելության գործունեության մեջ:

Բուրկհալտերը ԵԱՀԿ-ի մասնակից պետություններին կոչ է արել կտրուկ ընդլայնել առաքելությունը՝ ի հաշիվ համապատասխան գիտելիքներ ու հմտություններ ունեցող իրենց թեկնածուների առաջարկման և առաքելության համար ֆինանսավորման տրամադրման:

Սեպտեմբերի 5-ին Մինսկում ստորագրվել է արձանագրություն, որը ԵԱՀԿ-ի մոնիթորինգ է նախատեսում ինչպես Կիևի ուժերի և աշխարհազորայինների միջև հրադադարի ռեժիմի, այնպես էլ ռուս-ուկրաինական սահմանի երկայնքով անվտանգության գոտու նկատմամբ, հաղորդել է ՌԻԱ Նովոստին: