Փարիզը չի մեկնաբանում ՆԱՏՕ-ի երկրների կողմից Կիևին զենքի մատակարարման տեղեկատվությունը

Փարիզում չեն մեկնաբանում այն տեղեկությունները, ըստ որոնց՝ ՆԱՏՕ-ի գագաթնաժողովում պայմանավորվածություն է ձեռք բերվել Ուկրաինային սպառազինություն մատակարարելու մասին, տեղեկացնում է «Արմենպրես»-ը:

«Այդ տեղեկատվությունն ստացվել է ոչ պաշտոնական աղբյուրներից,-զրույցի ժամանակ ԻՏԱՌ-ՏԱՍՍ-ին հայտնել է Ելիսեյան պալատի մամուլի ծառայության ներկայացուցիչը:- Ուստի մենք մտադիր չենք դրա վերաբերյալ որևիցե մեկնաբանություն տալ»:

Սեպտեմբերի 7-ին Ուկրաինայի նախագահի խորհրդական և «Պյոտր Պորոշենկոյի դաշինք» կուսակցության ղեկավար Յուրի Լուցենկոն Facebook-ի իր էջում հայտնել է, որ ՆԱՏՕ-ի մի շարք երկրներ, ելույթ ունենալով Նյուպորտի հանդիպման արդյունքում պայմանավորվել են զենք մատակարարել Ուկրաինային:

«ՆԱՏՕ-ի գագաթնաժողովում պայմանավորվածություններ են ձեռք բերվել արևմտյան ռազմական խորհրդականների ուղարկման և ԱՄՆ-ից, Ֆրանսիայից, Իտալիայից, Լեհաստանից, Նորվեգիայից արդիական զենքի մատակարարումների շուրջ»,- գրել է Լուցենկոն:

Այդ տեղեկատվության հերքմամբ արդեն հանդես են եկել Վաշինգտոնը, Վարշավան և Օսլոն: Հռոմում պաշտպանության նախարարության աղբյուրները հայտնել են, որ Իտալիան դիտարկել է Ուկրաինային ոչ մահաբեր ռազմական հանդերձանք մատակարարելու հնարավորությունը, այն էլ՝ ՆԱՏՕ-ի գծով գործընկերների հետ սերտ կոորդինացմամբ»: