Հայաստանը ցնցած թունավորում. ո՞ւր են պաշտոնանկությունները և մեղավորները

Երեկ տեղեկացանք, որ Եղվարդի թիվ 1 մանկապարտեզում արձանագրվել են թունավորման դեպքեր: Ըստ առողջապահության նախարարության՝ այս պահի դրությամբ առկա է 67 հիվանդ, որից 48-ը հոսպիտալացվել է Եղվարդի «Նաիրի» բժշկական կենտրոն, 19-ը' «Նորք» ինֆեկցիոն հիվանդանոց, 1-ը' «Սուրբ Աստվածամայր» բժշկական կենտրոն:

Երեկվանից նորանշանակ նախարարը կարծես քննություն հանձնողի դերում լինի. նախարարության լրատվական բաժինն անընդհատ տեղեկատվություն է տարածում այն մասին, որ երեխաների վիճակը բարելավվում է: Սակայն, բարելավվելու դեպքում հիվանդների թիվը ոչ թե պակասում, այլ ավելանում է: 

Ըստ նախարարության` բակային համայցերի արդյունքում հայտնաբերվել է աղեստամոքսային թեթև գանգատներով ևս 21 երեխա: Փաստորեն, լավ ուսումնասիրելու դեպքում թիվը դեռ կավելանա:

Քրեական գործ, իհարկե, հարուցվել է: Ըստ ՀՀ Քննչական կոմիտեի՝ մանկապարտեզում կատարվել է զննություն, փորձանմուշներ են վերցվել մանկապարտեզում առկա պահեստավորված սննդի տեսակներից, օրվա ճաշատեսակից։ Առգրավվել են մանկապարտեզին մատակարարված սննդի փաստաթղթերը։ Վարույթն իրականացնող մարմնի որոշմամբ՝ ժամանակավորապես կասեցվել է մանկապարտեզի գործունեությունը, միջոցներ են ձեռնարկվում՝ պարզելու թունավորման աղբյուրը։ Արդեն երկար ժամանակ է, ինչ միջոցները արդյունք չեն տալիս. ո’չ աղբյուրի, ո’չ էլ մեղավորի մասին դեռևս ոչ մի հայտարարություն չկա: Լռում են և միայն հուսադրում՝ երեխաների վիճակը բարելավվում է... այսքանը:

Դեպքն իր տեսակով այնքան լուրջ է, որ առողջապահության նախարար Արմեն Մուրադյանը երկու ժամը մեկ երեխաների առողջական տվյալների մասին հաշվետվություն է ներկայացնում վարչապետին:

Փաստորեն, մանկապարտեզներում այսքան խոցելի են մեր երեխաները: Վստահ չենք՝ արդյո՞ք առողջ սնունդ է օգտագործվում, թե ոչ: Իհարկե, մեծ վախ կա սննդի վտանգավորության առումով, քանի որ ոչ հեռու անցյալում ունենք սարսափելի նախադեպ` բանակին մատակարարվում էր գոմեշի միս: Այսքան երեխա հայտնվել է հիվանդանոցում, և միայն դեկլարատիվ հայտարարություններ ենք լսում այն մասին, որ փորձանմուշներ են վերցվել, կամ նախարարը այցելել է հիվանդներին: Ոչ մի մեղավոր դեռևս չի հայտնաբերվել, պաշտոնանկություններ չկան և կարծես թե չեն էլ լինելու:

Ինչևէ, բալիկներին՝ առոջություն այսքան «անապահով Հայաստանում»: