Երբ ես ասում եմ Հայոց ցեղասպանություն, դրա մեջ շրջանառվում են բոլոր ազգերը. Գալուստ Սահակյան

Ազգային ժողովն այսօր սկսեց այս տարվա վերջին քառօրյայի աշխատանքները:

Նիստի մեկնարկին ԱԺ նախագահ Գալուստ Սահակյանը շնորհակալություն հայտնեց Բոլիվիայի ղեկավարությանը՝ Օսմանյան կայսրության իրականացրած 1915թ. Հայոց ցեղասպանության ճանաչման համար:

«Ցանկանում եմ մեր երախտագիտությունը հայտնել Բոլիվիայի խորհրդարանի երկու պալատներին, երկրի ղեկավարությանը, բարեկամ ժողովրդին՝ Հայոց ցեղասպանության ճանաչման համար»,- ասաց Գալուստ Սահակյանը:

Այնուհետև անցնելով քառօրյա նիստի օրակարգը ներկայացնելուն՝ Գալուստ Սահակյանը հայտարարեց, որ Արտաքին հարաբերությունների հանձնաժողովը բացասական եզրակացություն է տվել Զարուհի Փոստանջյանի նախագծին՝ ճանաչելու Օսմանյան կայսրությունում այլ ազգերի ցեղասպանությունը:

«Դուք նոր հայտնեցիք, որ Ազգային ժողովի արտաքին հարաբերությունների հանձնաժողովը բացասական եզրակացություն է տվել իմ օրինագծին՝ դատապարտելու Օսմանյան կայսրությունում այլ ազգերի՝ հույների, ասորիների, եզդիների և այլ ազգերի ցեղասպան քաղաքականությունը: Կխնդրեի պարզաբանում տրամադրեիք ինձ՝ վերջիվերջո անկախ ՀՀ ԱԺ-ն, երբ պետք է ճանաչի այլ ազգերի ցեղասպանությունը ևս Օսմանյան կայսրությունում»,- ասաց նա:

Վերջինիս ի պատասխան՝ Գալուստ Սահակյանն ասաց. «Հանձնաժողովի մեծամասնությունը դեմ է եղել օրինագիծն այս պահին ներկայացնելուն: Եթե իմ կարծիքն ենք ցանկանում իմանալ, երբ ես ասում Հայոց ցեղասպանություն, դրա մեջ շրջանառվում են բոլոր ազգերը»:

Պատգամավորները քննարկեցին հարցը: Գալուստ Սահակյանի առաջարկով Զարուհի Փոստանջյանը հանեց հարցը՝ այն հետագայում քննարկելու և նորովի ներկայացնելու համար: