Րաֆֆի Հովհաննիսյանը մանևրում է

«ժառանգություն» կուսակցության առաջնորդ Րաֆֆի Հովհաննիսյանը լրատվամիջոցների հետ հանդիպման էր եկել պաստառների մի տրցակով' ներկաներին և քաղաքական կուսակցություններին հրավիրելով ուրբաթ օրը մասնակցել քաղաքացիական ժողովին:

«Այս հավաքը նշանակում է, որ դուք առանձնանո՞ւմ եք եռյակից»,- «Արմենպրես»-ի փոխանցմամբ, հարց տվեց ներկա լրագրողներից մեկը, ինչին Հովհաննիսյանը հստակ պատասխան չտվեց: «Ներկայացրել ենք նախաձեռնություն, հռչակագիր և միացյալ հրապարակ ապահովելու հրամայականը: Մենք կունենանք որակյալ հավաք և գիտենք, որ որակը քանակ է ծնում: Ցանկանում ենք սահմանադրական հեղափոխություն' առանց արյան և ցնցումների: Չունենք արյան շռայլություն, որ տանք հայրենիքի ներսում: Քաղաքացին պահանջում է փոփոխություն և պատրաստ է դիմակայության: Հոկտեմբերի 24-ից հետո, այդ դեմ դիմացը չի կայացել: Ժողովուրդը եկավ, միացյալ հրապարակի սկիզբը դրվեց, բայց այն չունեցավ շարունակություն: Եթե այս հոսանքն ունենալու է հաջողություն, պետք է լինի հրապարակային: Պետք է դուրս գալ միջանցքներից և ժողովրդի հետ խոսել: Ես հրավիրում եմ համաքաղաքացիներին հանդիպման, որ քննարկենք հարցերը: Հույս ունենք, որ քաղաքական և քաղաքացիական զանգվածներ կլինեն: Մենք փող չունենք, որ ավտոբուսներով մարդկանց բերենք»,- ասաց Հովհաննիսյանը:

«Ինչո՞ւ չեք հայտարարում, որ պատրաստվում եք դուրս գալ եռյակից» հարցին Հովհաննիսյանը կրկին հիշեցրեց հռչակագրի ստորագրման անհրաժետությունը և կոչ արեց հստակեցնել մեխանիզմները, որպեսզի մոտեցումները լինեն հրապարակային: «Պետք է հասկանալ, որ խոսքն ու գործը տարբերվում են, եղել է փոխզիջում, փոխադարձ հարգանք' հանուն նպատակի: Հիմա խաչմերուկում ենք, որոշելու ենք, թե ո՞րն է հետագան: Նպատակը պետք է լինի սահմանադրական Հայաստան, ամողջական իշխանափոխություն, որը նշանակում է նախագահական և խորհրդարանական ընտրություններ, և հետո արդեն ժողովրդին պատկանող իշխանությունը կորոշի, թե ինչ է անելու»,- ասաց Հովհաննիսյանը' հավելելով, որ առաջիկա շաբաթների ընթացքում եռյակում հարցերը կկարգավորվեն և մեկ միասնական դիրքորոշում կունենան:

«Կա՞ արդյոք հակասություն և ո՞վ է ներկայացնում կուսակցության պաշտոնական տեսակետը» հարցին էլ Հովհաննիսյանը պատասխանեց, որ «Ժառանգությունում» չկա անհատի պաշտամունք, կա գաղափարների, տեսակետների և մտքերի ազատ մրցակցություն: Անդրադառնալով դեկտեմբերին ներքաղաքական կյանքում ծրագրվող գործողություններին' Հովհաննիսյանն ասաց, որ ամենայն հավանականությամբ դեկտեմբերին լուրջ զարգացումներ չեն լինի, քանի որ քաղաքական ուժերը կպատրաստվեն Նոր տարվա և Սուրբ ծննդյան տոնակատարություններին: