BBC-ն ներկայացրել է 2015 թվականի ամենահեռանկարային երաժիշտներին

BBC-ն ներկայացրել է 2015 թվականի ամենահեռանկարային երաժիշտների կոչման հավակնորդներին, տեղեկացնում է «Արմենպրես»-ը:

15 բազմախոստում երաժշտական նախագծերից բաղկացած ցուցակը կազմվել է BBC-ի Music Sound ավանդական հարցման արդյունքներով, որին մասնակցել են երաժշտության ինդուստրիայի բնագավառի ավելի քան հարյուր փորձագետներ, այդ թվում՝ երաժշտական քննադատներ, դիջեյներ, ձայնագրման լեյբլների աշխատակիցներ:

Ցուցակի ֆիգուրանտների մեծ մասը մենակատարներ են: Նրանցից է, օրինակ՝ Քեմբրիջի շրջանավարտ, բանաստեղծ և ռեպեր Ջորջ Մպանգան, որը հանդես է գալիս George The Poet կեղծանունով: Անվանակարգորդների թվում են նաև բրիտանացի 24-ամյա փոպ-արտիստ Ջեյմս Բեյը, 17-ամյա լոնդոնցի ռեպերը, որը հանդես է գալիս Novelist անվամբ, և 20-ամյա ամերիկացի Շամիր Բեյլին:

Երկար ցուցակի մեջ են նաև Sunset Sons, Wolf Alice, Slaves և Years & Years խմբերը: Հունվարին այս ցուցակի ֆիգուրանտներից մեկը կհայտարարվի 2015 թվականի ամենահեռանկարային երաժիշտը:

Ընտրություն կատարելիս պարտադիր պայման է եղել հավակնորդների մոտ այնպիսի սինգլների և ալբոմների բացակայությունը, որոնք մինչև 2014 թվականի հոկտեմբերը մտել են Մեծ Բրիտանիայում ամենավաճառվող ձայնապնակների քսանյակը:

Անցյալ տարիներին BBC-ի հարցման հաղթողներ են դարձել, օրինակ՝ Սեմ Սմիթը, Haim խումբը, Մայքլ Քիվանուան, Ջեսի Ջեյը, Ադելը և Միկան: Հարցումն անցկացվում է 2003 թվականից, հաղորդել է «Ինտերֆաքս»-ը: