Ջուլֆալակյանը հաղթանակով մեկնարկեց

Մրցաշրջան-2014-ի հերոսներից մեկը՝ 75 կգ քաշային կարգում հունահռոմեկան ոճի աշխարհի չեմպիոն, 2012 թ օլիմպիական խաղերի փոխչեմպիոն, Եվրոպայի կրկնակի չեմպիոն Արսեն Ջուլֆալականը նոր մրցաշրջանում իր առաջին գոտեմարտերն անցկացրեց ըմբշամարտի Գերմանիայի ակումբային թիմերի բունդեսլիգայի առաջնությունում:

Ի տարբերություն հունահռոմեկան ոճի ըմբշամարտի այս տարվա 98 կգ քաշային կարգի աշխարհի չեմպիոն Արթուր Ալեքսանյանի, ով այս տարի նորամուտն է նշում այս ստուգատեսում ու արդեն 4 անընդմեջ հաղթանակ է տարել բունդեսլիգայի «հյուսիսային» գոտու մրցաշարին մասնակցող «Մայնց-88»-ի կազմում, Ջուլֆալակյանը այս մրցաշարում ելույթ ունեցող հնաբնակներից է, քանի որ հանդես է գալիս 2009 թվականից:

Արսենը նոյեմբեր ամսվա ընթացքում իր ակումբի՝ KSV-Aalen-05-ի կազմում մասնակցեց Գերմանիայի բունդեսլիգայի «հարավային» գոտու մրցաշարի 10 և 11-րդ մրցափուլերի հանդիպումներին:

Դրանցից առաջինը «Աալենը-05»-ը ոչ-ոքի՝ 13:13 հաշվով ավարտեց «Ադելհաուզենի» հետ: Ջուլֆալակյանը հանդես եկավ 75 կգ քաշային կարգում և 3:0 հաշվով առավելության հասավ Բոզո Ստարզեվիչի նկատմամբ:

Ապա KSV–Aalen-05–ն ուժերը չափեց «հարավային» գոտու մրցաշարի առաջատար «Նենդիգենի» հետ ու զիջեց 5:16 հաշվով: Չնայած իր ակումբի պարտությանը՝ Արսենը այս մրցամարտում էլ իր թիմին հաղթական միավորներ վաստակեց: Նա 86 կգ քաշային կարգում համոզիչ՝ 5:0 հաշվով պարտության մտնեց Ֆլորիան Նեումայերին:

Հավելենք նաև, որ «հարավային» գոտու մրցաշարին մասնակցում է 7 թիմ ու նրանց մրցապայքարում Ջուլֆալակյանի թիմը, որն անցկացրած 11 հանդիպումներից 5-ում հաղթել է, նույնքան պարտություն է կրել ու մեկ հանդիպում էլ ոչ-ոքի է ավարտել, առայժմ ընթանում է 4-րդ տեղում: 12-րդ մրցափուլի հանդիպումը «Աալեն-05»-ը կանցկացնի դեկտեմբերի 6-ին, որտեղ մրցելու է «Վեինքարտենի» հետ, որը հիմա զբաղեցնում է մրցաշարային աղյուսակի 2-րդ հորիզոնականը: Այս մասին տեղեկացնում է wrestling.am-ը: