ԱՄՆ-ն Ադրբեջանին կոչ է արել պահպանել մարդու հիմնարար իրավունքները

ԱՄՆ պետքարտուղարության մամուլի քարտուղար Ջեյն Փսակին Ադրբեջանի կառավարությանը կոչ է արել պահպանել մարդու հիմնարար իրավունքները: Այս մասին, ինչպես հաղորդում է «Արմենպրես»-ը' վկայակոչելով «Ամերիկայի ձայն» ռադիոկայանը, Փսակին հայտարարել է' մեկնաբանելով Ադրբեջանում իրավապաշտպանների վերջին ձերբակալությունները:

«Մենք խիստ անհանգստացած ենք քաղաքացիական հասարակության նկատմամբ ադրբեջանական կառավարության մտցրած սահմանափակուններով»,- ասել է Փսակին:

Նրա խոսքով' ԱՄՆ-ն անհանգստացած է նաև այն բանով, որ ադրբեջանական կառավարությունը չի կատարում մարդու իրավունքների ոլորտում ստանձնած պարտավորությունները:

Ջեյն Փսակին պաշտոնական Բաքվին կոչ է արել հարգել քաղաքացիների իրավունքները և նրանց համար պայմաններ ապահովել սեփական հայացքներն ազատորեն արտահայտելու համար:

«Ադրբեջանի իշխանությունները ապագա կայունությունն ու բարգավաճումը կարող են ապահովել' ստեղծելով պայմաններ քաղաքացիական հասարակության համար»,- նշել է Փսակին:

Նրա խոսքով' ԱՄՆ-ի պաշտոնական անձինք Ադրբեջանի քաղաքական ղեկավարությանն արդեն արտահայտել են իրենց դժգոհությունը: