ԵՏՄ-ում կանայք «Կրասնայա Մոսկվա» կօգտագործեն. քննարկում՝ ԱԺ-ում

Ազգային ժողովում այսօր շարունակվեց «2014 թ. հոկտեմբերի 10-ին Մինսկում ստորագրված «Հայաստանի Հանրապետության' «Եվրասիական տնտեսական միության մասին» 2014 թ. մայիսի 29-ի պայմանագրին միանալու մասին» պայմանագրի քննարկումը:

Քննարկման ժամանակ Ֆինանսների փոխնախարար Սուրեն Կարայանին հարց ուղղեց ՀԱԿ խմբակցության պատգամավոր Նիկոլ Փաշինյանը.

«Հիմա ասում եք՝ փաստ չէ, թե որ ապրանքները կթանկանան մաքսատուրքի բարձրացման արդյունքում: Եթե չի թանկանա, էն 700 ապրանքների համար ինչի՞ եք վերապահում արել: Նրանցն էլ նույնը թողեիք, մեկ ա, չէր թանկանալու:

Ասում եք, ասեք՝ որ ապրանքներն են դրանք, ասում եք՝ կես ժամ կտևի, ո՞ւր եք շտապում, մարդկանց տեղյակ պահեք, առավոտից խոսում եք, կոնկրետ ինֆորմացիա չենք տալիս: Գիտե՞ք՝ առավոտվանից դրամի կուրսն ինչից ինչ է դարձել, և դա ուղղակիորեն կապված է այն պրոցեսների հետ, ինչը տեղի է ունենում ԵՏՄ-ում»:

Ֆինանսների փոխնախարար Սուրեն Կարայանը նշեց, որ այդ 750 ապրանքները, իրենք վերցվել են որպես բացառություններ, դրանք շատ զգայուն ապրանքատեսակներ են:

«Առաջին հերթին դրանք այն ապրանքատեսակներն են, որոնք ներմուծվում են ՀՀ երրորդ երկրներից և ունեն առաջնային ազդեցություն մեր բնակչության վրա: Դրանք կազմում են սպառողական զամբյուղի մաս կազմող ապրանքատեսակները:

Երկրորդ խումբը հումքերն են, որոնք չկան ԵՏՄ տարածքում»,- ասաց փոխնախարարը:

Վերջինս խումբ առ խումբ թվարկեց, թե որ ապրանքները կթանկանան:

Նիկոլ Փաշինյանը նկատեց՝ փոխնախարարն ընդամենը կոնկրետ երկու ապրանքի անուն նշեց՝ օծանելիք և կահույք, սակայն ստացվեց, որ հիմա մեր կանայք սկսելու են «տռայնոյ դուխի» ու վարունգի «օդեկոլոն» օգտագործել կամ ղազախական կահույք:

«Կրասնայա Մոսկվա»,- նրան ժպտալով ուղղեց ԱԺ փոխնախարար Հերմինե Նաղդալյանը: