«Հրապարակ». Նույն ժողովուրդն է, բայց մեկը սովից սատկում ա, մյուսը ծաղկում է. Մանվել Բադեյան

«Ով այդ՝ ԵՏՄ-ի փաստաթղթի տակ վավերացնի, թող իր ժառանգների համար գրի՝ այս օրը, այսինչ ժամին ես եղել եմ էշի քուռակ: Ես բառեր չեմ գտնում»,- ԱԻՄ կուսակցության նախագահ Պարույր Հայրիկյանի նախօրեի հայտարարությանը ՀՀԿ խմբակցության պատգամավոր Մանվել Բադեյանն այսպես պատասխանեց. «Է, հետո՞ ինչ», ապա սկսեց վերլուծել տարածաշրջանային զարգացումները, որպեսզի ապացուցի, որ Հայրիկյանը «ճիշտ չի»:

«Հյուսիսային Կորեան որեւէ ինտեգրացիոն պրոցեսների չի մասնակցում, ես չեմ հասկանում՝ Հայաստանն ինչի՞ պետք է նրան նմանվի, իսկ, ահա, Հարավային Կորեան մասնակցում է մի շարք ինտեգրացիոն պրոցեսների, տնտեսական կառույցների: Նույն ժողովուրդն է, բայց տարբեր կողմնորոշմամբ, մեկը սովից սատկում ա, ու, ինչպես Հայրիկյանն է ասում, էշի քուռակի պես են ապրում, մյուսը ծաղկում է»: Իսկ անկախությո՞ւնը: «Բացարձակ հիմարություն է, որովհետեւ եթե տնտեսական համագործակցությունը պետք է բերի կայունացման եւ հզորացման, իսկ ես չեմ պատկերացնում, որ ավելի հզոր երկիրը խոցելի լինի սուվերենության տեսակետից»:

ԲՀԿ-ականների մեջ էլ տարակարծություններ կան. օրինակ, Ռուստամ Գասպարյանը տեղեկացրեց, որ դեմ կքվեարկի, իսկ Մուշեղ Պետոյանը կողմ է քվեարկելու, թեպետ կուսակցությունում հարցն ազատ են թողել, բայց Պետոյանն էլ չի ուզում Հայրիկյանին հավասարվել: «Հո չե՞նք իջնելու Հայրիկյանի մակարդակին»,- ասում է նա: Պատգամավորը չի պատասխանում՝ պայմանագիրը կարդացե՞լ է, թե՞ ոչ, բայց հպարտ հայտարարում է. «Քվեարկելու եմ հանուն Հայաստանի տնտեսական անկախության»:

Մանրամասները՝ թերթի այսօրվա համարում