Պատգամավորները վստահ են, որ Բոլիվիային հաջորդելու են այլ երկրներ

Տարբեր քաղաքական հայացքներ ունեցող խորհրդարանական ուժեր ներկայացնող Մարգարիտ Եսայանն ու Աղվան Վարդանյանը վստահ են, որ Հայոց ցեղասպանության 100-րդ տարելիցի նախաշեմին մեծ թվով երկրներ կճանաչեն 20-րդ դարի առաջին մեծ ոճիրը: Հայոց ցեղասպանությունը ճանաչած ամենավերջին երկիրը Հարավային Ամերիկայում գտնվող Բոլիվիան է: ՀՀԿ-ական պատգամավոր Մարգարիտ Եսայանը' որպես հայուհի և ցեղասպանությունից մազապուրծ ընտանիքի զավակ, նախ շնորհակալություն հայտնեց Բոլիվիայի խորհրդարանին իրենց կատարած քայլի համար: «Դա վստահություն է ներշնչում, որ այլ երկրներ ևս կմիանան ու այդպիսի հայտարարություններով հանդես կգան: Կա պատմական ճշմարտություն ու արդարություն, ու բոլոր երկրները հասկանում են շատ լավ, որ, եթե իրենք չեն կանգնում պատմական արդարության կողքին, պատմության թուրը կարող է շրջվել իրենց դեմ: Գրեթե վտահ եմ, որ շատ ավելի մեծ թվով երկրներ կունենանք, որոնք կդատապարտեն Հայոց ցեղասպանությունը և իրենց «ո'չը» կասեն բոլոր ցեղասպանություններին 100-րդ տարելիցի նախաշեմին,- «Արմենպրես»-ի հետ զրույցում ասաց Մարգարիտ Եսայանը' հավելելով, որ Հայաստանի արտգործանախարարության ամենօրյա աշխատանքը հենց դրան էլ միտված է:

Նա նաև նշեց, որ խորհրդարանական դիվանագիտության մակարդակով ունեն պայմանավորվածություններ մի շարք երկրների հետ, որպեսզի 2015 թվականին այդ երկրների խորհրդարաններում կազմակերպվեն ցուցահանդեսներ, որոնք կպատմեն Հայոց ցեղասպանության մասին: «Ցուցահանդեսի ժամանակ կներկայացվեն ոճրից փրկված իրեր, գրքեր, նմուշներ, որոնք էլ խթան կարող են հանդիսանալ, որ այդ երկրները ճանաչեն ու դատապարտեն ցեղասպանությունը»,- հայտնեց պատգամավորը:

ՀՅԴ-ական Աղվան Վարդանյանն էլ նշեց, որ Բոլիվիայի կողմից Հայոց ցեղասպանության ճանաչումը հույս է ներշնչում, որ 100-րդ տարելիցի նախաշեմին այլ երկրներ ևս կիմանան: «Հարավային Ամերիկայում տարիներ շարունակ մեծ աշխատանք է տարվել այս ուղղությամբ: Դուք գիտեք, որ առաջինը Հայոց ցեղասպանությունը ճանաչել է Ուրուգվայը, այնուհետև Արգենտինան: Հայ դատի գրասենյակներն այնտեղ ակտիվ աշխատում են: Բայց Բոլիվիայի ճանաչումը պետք է կարևորել ևս մեկ առումով, որ բավական երկար ժամանակ մենք բաց ունեինք, հայ-թուրքական արձանագրությունների ֆոնի վրա շատ երկրներ այնպիսի տպավորություն ունեին, որ երկխոսություն կա ու ձեռնպահ էին մնում ցեղասպանությունը ճանաչելուց: Բայց կածես իրավիճակը հաղթահարվում է և 100-րդ տարելիցի նախաշեմին շատ կարևոր է, որ ևս մեկ երկիր իր երկու պալատներով ճանաչել է ցեղասպանությունը»,- ընդգծեց Աղվան Վարդանյանը:

Բոլիվիայի խորհրդարանի երկու պալատների կողմից ընդունված փաստաթղթերում, մասնավորապես հայտարարվում է. «1915 թվականի ապրիլի 24-ի գիշերն Օսմանյան կայսրության իշխանությունները, «Միություն և առաջադիմություն» կուսակցության առաջնորդները, երիտթուրքերն սկսեցին հայ մտավորականների, քաղաքական գործիչների, գիտնականների, գրողների, արվեստի գործիչների, հոգևորականների, բժիշկների, հասարակական գործիչների և մասնագետների ձերբակալությունները, ծրագրված աքսորները, իսկ այնուհետև' պատմական Արևմտյան Հայաստանի և Անատոլիայի տարածքներում հայազգի քաղաքացիական բնակչության զանգվածային ջարդերը»:

Խորհրդարանի երկու պալատները «հաստատում են իրենց հավատարմությունը մարդու իրավունքներին, ճշմարտության և արդարության արժեքներին, արտահայտում են իրենց զորակցությունը և դատապարտում Հայոց ցեղասպանության և հայ ժողովրդի դեմ իրականացված մարդկային ծանր հանցագործության ժխտողականության քաղաքականությունը»: