Հակաահաբեկչական կոալիցիան կհատուցի ԻՊ-ի կողմից սպանված մարդկանց համար. Օբամա

Միջազգային հակաահաբեկչական կոալիցիան կհատուցի «Իսլամական պետություն» խմբավորման զինյալների կողմից բոլոր սպանվածների համար: Այդ մասին, ինչպես տեղեկացնում է «Արմենպրես»-ը, հայտարարել է ԱՄՆ-ի նախագահ Բարաք Օբաման այն բանից հետո, երբ հաստատվել է ահաբեկիչների կողմից հորդանանցի օդաչու Մուազ Յուսեֆ ալ Կասազբայի նկատմամբ կատարված դատաստանի վերաբերյալ տեղեկատվությունը: Ամերիկյան ժողովրդի անունից նա ցավակցություն է հայտնել սպանված լեյտենանտի ընտանիքին, հորդանանցի զինծառայողներին, ինչպես նաեւ Աբդալա Երկրորդ թագավորին:

«Այսօր կոալիցիան կռվում է, որպեսզի հատուցի բոլոր նրանց համար, ովքեր ԻՊ-ի դաժանության զոհ են դարձել: Նրանց մասին հիշողությունը ոգեշնչում է մեզ ու կոալիցիայի գծով մեր գործընկերներին՝ չթուլացնելու ԻՊ-ին ու նրա գաղափարախոսությանը վերջ դնելու վճռականությունը»,- նշել է ԱՄՆ-ի նախագահը:

Ֆրանսիայի նախագահ Ֆրանսուա Օլանդն իր հերթին խստիվ դատապարտել է հորդանանցի օդաչուի նկատմամբ կատարված հաշվեհարդարը: Ցավակցության եւ զորակցության խոսքերով դիմելով զոհվածի ընտանիքին, Հորդանանի ժողովրդին ու թագավորին, Ֆրանսիայի ղեկավարն ընդգծել է, որ Փարիզն ու Ամմանը պետք է շարունակեն Մերձավոր Արեւելքում ահաբեկչության դեմ պայքարին ուղղված համատեղ ջանքերը:

ՄԱԿ-ի գլխավոր քարտուղար Պան Գի Մունը նույնպես դատապարտել է սպանությունը՝ նշելով ահաբեկչության եւ ծայրահեղականության դեմ պայքարն ակտիվացնելու ակտիվությունը:

Ավելի վաղ ԻՊ-ի զինյալները Համացանցում տարածել են լուսանկարներ եւ տեսանյութեր՝ հորդանանցի օդաչուի նկատմամբ դատաստանի կադրերով: Ալ Կասազբան, որի ինքնաթիռը 2014 թվականի դեկտեմբերի 24-ին աղետի է ենթարկվել Սիրիայի Ռաքա քաղաքի երկնքում, ողջակիզվել է իսլամիստների կողմից: