Իսլամիստներն այժմ էլ սպառնում են բելգիական Het Laatste Nieuws թերթի խմբագրությանը

Բելգիական Het Laatste Nieuws թերթի խմբագրությունում, որը լույս է տեսնում նիդեռլանդերեն, նամակ է ստացվել իսլամիստական բնույթի սպառնալիքներով: Այդ մասին, ինչպես տեղեկացնում է «Արմենպրես»-ը, հրատարակությունը հաղորդել է փետրվարի 4-ին, ընդ որում՝ մեջբերելով նամակի զգալի հատված:

Դրա անանուն հեղինակներն ակնարկում են իրենց կապերն «Իսլամական պետություն» ահաբեկչական կազմակերպության հետ, որը հաստատվել է Իրաքում և Սիրիայում: Նրանք նախազգուշացնում են, որ արդեն Բելգիայում են գտնվում «ռումբեր և պայթուցիկ նյութերով հանդերձված ավտոմեքենաներ», և սպառնում են, որ երկրում կկրկնվի «այն, ինչ տեղի ունեցավ Ֆրանսիայում»՝ նկատի ունենալով հարձակումը Charlie Hebdo երգիծական շաբաթահանդեսի խմբագրության վրա:

Ինչպես նշում է ՏԱՍՍ-ը, ոստիկանությունը ձեռնամուխ է եղել պատահածի հետաքննությանը:

Փարիզի Charlie Hebdo-ի խմբագրատան վրա հարձակումը տեղի է ունեցել հունվարի 7-ին: Արմատական իսլամիստների զոհ է դարձել 12 մարդ՝ թերթի 10 աշխատակիցներ և երկու ոստիկան: