Տարեսկզբից առաջին անգամ Արևմտյան Աֆրիկայում աճել է Էբոլա վիրուսով հիվանդացությունը. ԱՀԿ

Տարեսկզբից ի վեր առաջին անգամ Արևմտյան Աֆրիկայում անցած շաբաթ Էբոլա վիրուսի հարուցած հիվանդացության դեպքերի աճ է նկատվել: Այդ մասին, ինչպես տեղեկացնում է «Արմենպրես»-ը, փետրվարի 4-ին հաղորդել է Առողջապահության համաշխարհային կազմակերպությունը: Նրա տվյալներով՝ հունվարի 26-ից մինչև փետրվարի 1-ը գրանցվել է վտանգավոր հիվանդության 124 նոր դեպք՝ 80-ը Սիեռա Լեոնեում, 39-ը՝ Գվինեայում, և 5-ը՝ Լիբերիայում:

ՏԱՍՍ-ը հիշեցնում է, որ մինչ այժմ ցուցանիշներն անշեղորեն նվազում էին, իսկ հունվարի 18-ից մինչև 25-ը Գվինեայում, Լիբերիայում և Սիեռա Լեոնեում հիվանդացությունը նվազել էր մինչև վերջին յոթ ամսվա ընթացքում ամենացածր մակարդակ՝ 99 հիվանդացած:

Ինչպես նշում է ԱՀԿ-ն, Գվինեայում հիվանդության «աշխարհագրության» ընդլայնումը, Սիեռա Լեոնեում վիրուսի շարունակվող տարածումը և համաճարակի դեմ պայքարի միջոցառումներին տեղական մի շարք համայնքների կողմից ցուցաբերվող դիմադրությունը «ցույց են տալիս, որ Էբոլայի համաճարակի դեմ պայքարը դեռևս զգալի խնդիրների է բախվում»: ԱՀԿ-ի փորձագետները նախազգուշացնում են, որ անձրևների սեզոնի մոտենալու կապակցությամբ անհրաժեշտ է շտապ միջոցներ ձեռնարկել Էբոլայի դեմ, «հատկապես հեռավոր շրջաններում, որտեղ անհամեմատ ավելի դժվար է հասնել»: 

ԱՀԿ-ի փետրվարի 1-ի տվյալների համաձայն՝ աշխարհում Էբոլա տենդից մահացել է 8981 մարդ, վարակվել են 22 հազար 495-ը: