Մարտին Հունաստանն առանց փողի կմնա. Bloomberg

Եթե մինչև փետրվարի 25-ը Հունաստանը չպայմանավորվի վարկատուների հետ, երկիրը կբախվի դրամական միջոցների պակասի: Այս մասին գրում է Bloomberg-ը՝ հղում անելով աղբյուրներին:

Ներկայումս կարճաժամկետ պարտատոմսերի սահմանագիծը մոտ 15 մլրդ եվրո է: Աղբյուրներից մեկի խոսքով՝ Հունաստանի կառավարությունը ծախսերի կրճատման միջոցով կարող է մի քանի շաբաթ ժամանակ ձգել որոշում ընդունելու համար, բայց մինչև մարտի վերջ կառավարությունը ստիպված կլինի ընտրել ԵՄ-ից ֆինանսական օգնության պայմանների (որոնք ներկայումս չեն ընդունվում) և եվրոգոտուց դուրս գալու միջև:

Վարկատուները սահմանագծի ավելացման հարցը կքննարկեն փետրվարի 5-ին Հունաստանի ֆինանսների նախարար Յանիս Վարուֆակիսի և Գերմանիայի ֆինանսների նախարար Վոլֆգանգ Շոյբլեի հանդիպման ժամանակ:

Ավելի վաղ հաղորդվել էր, որ ԵԿԲ հրաժարվել է ընդունել հունական պարտատոմսերը որպես վարկի դիմաց գրավ: