Ուկրաինայի իրադրությունը և ահաբեկչության դեմ պայքարը՝ Մյունխենի խորհրդաժողովի ուշադրության կենտրոնում

Ուկրաինայի հակամարտության կարգավորումը և այդ երկրում տիրող ճգնաժամի լույսով անվտանգության եվրոպական ճարտարապետության ապագան, ահաբեկչության դեմ պայքարը և Իրանի միջուկային ծրագրի շուրջ ստեղծված իրադրությունը. սրանք այն թեմաներն են, որոնք հիմնականը կլինեն փետրվարի 6-ին Մյունխենում բացվող միջազգային խորհրդաժողովում, որը նվիրված է անվտանգության քաղաքականության հարցերին, տեղեկացնում է «Արմենպրես»-ը:

Թվով 51-րդ համաժողովին կմասնակցի պետությունների ու կառավարությունների երկու տասնյակ ղեկավար, ինչպես նաև արտաքին գործերի և պաշտպանության շուրջ 60 նախարար, գործարար և գիտական շրջանների, իրավապաշտպան կազմակերպությունների ներկայացուցիչներ ամբողջ աշխարհից:

ՏԱՍՍ-ի հաղորդմամբ՝ Մյունխենի խորհրդաժողովի ղեկավար գերմանացի դիվանագետ Վոլֆգանգ Իշինգերը նշել է, որ համաժողովի շրջանակներում սպասում է «ինտենսիվ բանակցություններ»՝ նվիրված ուկրաինական թեմատիկային: «Ժամանելու են Ուկրաինայի նախագահ Պյոտր Պորոշենկոն, Ռուսաստանի ԱԳ նախարար Սերգեյ Լավրովը, ԱՄՆ-ից՝ փոխնախագահ Ջոզեֆ Բայդենը և պետքարտուղար Ջոն Քերին»,- հիշեցրել է Իշինգերը:

Վերջին չորս տարվա ընթացքում առաջին անգամ հանդիպմանը մասնակցելու է ԳՖՀ-ի կանցլեր Անգելա Մերկելը, որը, ըստ կազմակերպիչների տվյալների, իր ելույթում առանձնակի ուշադրություն կդարձնի Ուկրաինայի ճգնաժամին: Մյունխեն կժամանեն նաև ՆԱՏՕ-ի գլխավոր քարտուղար Ենս Ստոլտենբերգը, ԵՄ-ի արտաքին գործերի և անվտանգության քաղաքականության գերագույն ներկայացուցիչ Ֆեդերիկա Մոգերինին, Եվրախորհրդարանի նախագահ Մարտին Շուլցը, ՉԺՀ-ի Պետխորհրդի անդամ Յան Ցզեչին, Աֆղանստանի նախագահ Աշրաֆ Ղանի Ահմադզայը, Իրաքի վարչապետ Հեյդար ալ Աբադին, Մեծ Բրիտանիայի ԱԳ նախարար Ֆիլիպ Համոնդը: