Սաուդյան Արաբիան պատ կկառուցի Իրաքի հետ սահմանին

Սաուդյան Արաբիայի իշխանությունները սկսել են Իրաքի հետ սահմանին 900 կիլոմետր ընդհանուր երկարությամբ պատնեշի կառուցման աշխատանքները: Այս մասին հայտնել է korrespondent.net-ը՝ հղում անելով ՏԱՍՍ գործակալությանը:

Նախագծի իրականացումն ընթանում է ողջ թափով և կարող է ավարտվել դեռևս մինչև այս տարվա վերջ:

«Սաուդյան պատը» բաղկացած կլինի ավանդական պատնեշներից և հսկողության բարձրտեխնոլոգիական համակարգերից: Ստեղծվում են հատուկ ավազե արգելքներ, որոնք դժվարացնում են մարդկանց և տեխնիկայի տեղաշարժը, այնուհետև պողպատե ցանկապատի տեսքով խոչընդոտ և փշալարի մի քանի շարք:

Սահմանային գոտում կտեղադրվեն 78 դիտորդական աշտարակներ, որոնք հագեցած կլինեն SPEXER 2000 ժամանակակից ռադարային համակարգով: Այդ սարքերը կկարողանան բացահայտել շարժվող օբյեկտները 18-ից 36 կիլոմետր հեռավորության վրա` կախված դրանց չափից:

Բացի այդ, պատը հագեցած կլինի ստորգետնյա սենսորներով և գիշերային տեսողության տեսախցիկներով: Սահմանի խախտման դեպքում անմիջապես կժամանեն զրահապատ մեքենաներով արագ արձագանքման խմբերը:

Պատը կհսկի միաժամանակ 3 հազար զինվոր՝ զրահապատ մեքենաներով: