Ադրբեջանում Թարթառի բնակիչների հետ բախման ժամանակ 8 ոստիկան վիրավորվել է

Ադրբեջանի ՆԳՆ-ն և Գլխավոր դատախազությունը երկու օր անցնելուց հետո անդրադարձել են փետրվարի 4-ին Արցախի Հանրապետության հետ սահմանակից Թարթառի շրջանում բնակչության և ոստիկանության միջև տեղի ունեցած զանգվածային բախմանը, և հայտնել է, որ միջադեպի ժամանակ ոստիկանության 8 աշխատակից վիրավորվել է:

Այս մասին, ինչպես հաղորդում է «Արմենպրես»-ը, հայտնում է ադրբեջանական ԶԼՄ-ները:

Նշվում է, որ ոստիկանության հետ բախմանը մասնակից 6 բնակիչ ձերբակալվել են: Միջադեպը տեղի է ունեցել այն բանից հետո, երբ հայտնի է դարձել, որ Թարթառի ոստիկանական բաժանմունքում «կախվել է» թմրանյութերի ապօրինի առևտրի մեջ մեղադրվող տեղի բնակիչ Սաբուհի Դունյամալիևը, ում մեղքը չէր հաստատվել: Այդ դեպքից հետո բնակչության մեջ լուրեր են տարածվել, որ երիտասարդին կախել են խոշտանգումներից մահանալուց հետո:

Մոտ 100 բնակիչ հարձակվել են ոստիկանական բաժանմունքի վրա, ծեծի ենթարկել ոստիկաններին և նյութական մեծ վնաս հասցրել շենքին: Միջադեպի հետևանքով 8 ոստիկան տարբեր աստիճանի վնասվածքներով տեղափոխվել են հիվանդանոց:

Ադրբեջանի ՆԳՆ և Գլխավոր դատախազության կողմից այդ առնչությամբ տարածած համատեղ հայտարարության մեջ ասվում է, որ բժշկական փորձագիտական քննությամբ Դունյամալիևի մարմնի վրա «բռնության հետքեր չեն հայտնաբերվել»:

Միջադեպի հետ կապված «ծառայության նկատմամբ անփութություն» ցուցաբերած Թարթառի ոստիկանության մեկ աշխատակից հեռացվել է աշխատանքից և Ադրբեջանի ՆԳՆ շարքերից: