Չինաստանում մահապատժի են ենթարկել միլիարդատեր Լյու Հանին

Չինաստանի դատարանը հրաման է տվել միլիարդատեր Լյու Հանի՝ երկրի հանքարդյունահանման խոշորագույն կորպորացիներից մեկի՝ Hanlong Group-ի նախկին ղեկավարի նկատմամբ մահվան դատավճիռն ի կատար ածելու մասին, որը մեղադրվում էր հանցավոր խմբավորում կազմակերպելու մեջ, հաղորդում է «Արմենպրես»-ը՝ հղում անելով Սինհուա գործակալությանը:

Հուբեյի նահանգի Գերագույն ժողովրդական դատարանը փետրվարի 9-ին հրաման է արձակել է նաև Լյու Հանի չորս մեղսակիցների նկատմամբ մահվան դատավճիռն ի կատար ածելու մասին: Ընդամենն աղմկահարույց գործում ներգրավված է 36 մարդ: Հինգը դատապարտվել են մահապատժի՝ երկու տարվա հետաձգմամբ, չորսը՝ ցմահ բանտարկության, ևս 22-ը՝ տարբեր ժամկետների բանտարկությունների:

Լյու Հանի հետ մահապատժի են ենթարկվել նրա եղբայրը՝ Լյու Վեյը, ինչպես նաև Տան Սանբինուն, Չժան Դունհուան և Տյան Սանվեյուն: Մահապատիժն ի կատար ածելուց առաջ դատարանը դատապարտյալներին թույլատրել է հանդիպել ընտանիքների հետ:

Ինչպես նշում է ՌԻԱ Նովոստին, Լյու Հանը մեղադրվում էր «հանցավոր մաֆիական խմբավորման» կազմակերպման և կանխամտածված սպանության մեջ: Մեղադրանքի համաձայն՝ կազմակերպված հանցախմբի անդամները անօրինական գործունեությամբ են զբաղվել 1993 թվականից, գլխավորապես Սիչուանի նահանգում:

Խմբավորումը՝ Լյու Հանի գլխավորությամբ, ապօրինաբար վերահսկողության տակ էր վերցրել տեղական տենտեսության մի շարք ճյուղեր՝ «ստանալով վիթխարի շահույթներ և լրջորեն խախտելով տնտեսական և հասարակական կարգը»: