Համաշխարհային բանկը հերթական վարկն է տրամադրել Ուկրաինային

Համաշխարհային բանկը և Ուկրաինան 378,4 մլն դոլար վարկի պայմանագիր են ստորագրել: Փողը կծախսվի ուկրաինական էներգացանցերի զարգացման վրա, տեղեկացնում է «Արմենպրես»-ը՝ հղում անելով «Ինտերֆաքս»-ին:

330 մլն դոլարը հատկացնում է Համաշխարհային բանկը, 48,4 միլիոնը՝ Մաքուր տեխնոլոգիաների հիմնադրամը: «Այս ներդրումը կօգնի վերականգնել էլեկտրաէներգիայի մատակարարման ազգային ցանցը, բարձրացնել Ուկրաինայի էներգետիկական անվտանգությունը և նվազեցնել ազդեցությունը կլիմայի փոփոխման վրա»,-գործակալությունը մեջբերել է Համաշխարհային բանկի՝ Ուկրաինայի, Բելառուսի և Մոլդովայի հարցերով տնօրեն Չիմյաո Ֆանի խոսքը:

Ավելի վաղ Համաշխարհային բանկն արդեն ֆինանսական աջակցություն ցուցաբերել է Ուկրաինային: 2014 թվականին կազմակերպությունը հատկացրել էր 200 մլն դոլար: Միջոցները նույնպես ուղղորդվել էին էներգացանցերի զարգացմանը:

2014 թվականի տվյալներով՝ հանրապետության արտաքին պետական պարտքը հասել է 30 միլիարդ դոլարի: Դա Ուկրաինայի ՀՆԱ-ի քառորդ մասն է:

Հունվարի 13-ին Ուկրաինայի վարչապետ Արսենի Յացենյուկը հայտնել է, որ 2015 թվականին Կիևը պետք է մարի 11 մլրդ դոլարի պարտք: Մինչդեռ Կիևի ոսկեարժութային պաշարները չեն գերազանցում 8 մլրդ դոլարը: