Կիպրոսում դատարանը երկրի պատմության մեջ առաջին անգամ վճիռ է կայացրել շան օգտին

Կիպրոսում Լիմասոլի օկրուգային դատարանը երկրի պատմության մեջ առաջին վճիռ է կայացրել շան օգտին: Դրա հիման վրա ամերիկյան ստաֆորդշիրյան թերիերն առգրավվել է տիրոջից և հանձնվել պետության խնամակալությանը: Այս մասին, ինչպես տեղեկացնում է «Արմենպրես»-ը, Կիպրոսի լրատվական գործակալությանը պատմել է Լիմասոլի ոստիկան ական դեպարտամենտի քրեական հետախուզության պետ Յոանիս Սոտիրիադիսը:

Շան համար միջնորդել է Կիպրոսի ոստիկանությունը, որն ստացված ահազանգի հետաքննության արդյունքում հանգել է այն եզրակացության, որ թերիերը ողորմելի գոյություն է քարշ տալիս, սոված է մնում և փաստորեն թողնված է բախտի քմահաճույքին: Սկսված դատաքննության ընթացքում ոստիկանությունը դիմում է ներկայացրել կենդանուն ժամանակավոր խնամակալության հանձնելու խնդրանքով, ինչպես դա արվում է այն երեխաների նկատմամբ, որոնց ծնողներից վերցնում են նրանց ծնողական իրավունքից զրկելու կապակցությամբ:

Ինչպես նշում է ՏԱՍՍ-ը, դատարանը բավարարել է միջնորդությունը, և շունը հանձնվել է անասնաբուժական կլինիկա, որտեղ նրա համար խնամք կապահովվի: