Հարավային Կորեայում բանտարկել են «Սևոլ» լաստանավին օգնության հասած նավի կապիտանին

Հարավային Կորեայում չորս տարվա բանտարկության են դատապարտել առափնյա պահպանության ուժերի նավի հրամանատարին, ով առաջինն է հայտնվել «Սևոլ» լաստանավի խորտակման վայրում: Քվանջու քաղաքի դատավորը Կիմ Կյուն Իրին մեղավոր է ճանաչել չկանխամտածված սպանության մեջ, հաղորդում է «Արմենպրես»-ը՝ հղում անելով «Ֆրանսպրես» գործակալությանը:

Դատարանը եզրակացրել է, որ Կիմ Կյուն Իրը չափազանց ուշ է սկսել խորտակվող լաստանավի ուղևորներին փրկելու գործողությունը: Դրա հետ մեկտեղ նշվում է, որ հետաքննության ընթացքում նա պնդել է, թե բարձրախոսով տարհանում է հայտարարել:

Ընդամենը «Սևոլ»-ի խորտակման գործով արդեն դատապարտվել է ավելի քան 50 մարդ, նրանց թվում են անձնակազմի 15 անդամները և գործարկու ընկերության մի քանի ներկայացուցիչներ: Լաստանավի կապիտան Լի Չժուն Սոկը դատապարտվել է 36 տարվա բանտարկության:

Հետաքննությունը պարզել է, որ նավապետը և անձնակազմի անդամները, քողարկվելով քաղաքացիական հագուստով, առաջինների թվում լքել են աղետյալ նավը՝ չկազմակերպելով ուղևորների տարհանումը:

«Սևոլ» լաստանավը 2014 թվականի ապրիլի 16-ին խորտակվել էր Կորեական թերակղզու հարավարևմտյան ափին: Նավի վրա եղել Է 476 մարդ, որոնց մեծամասնությունը դպրոցականներ էին: Զոհվել է 304 մարդ: