Խորտակված Costa Concordia-ի նավապետը դատապարտվեց 16 տարվա բանտարկության

2012 թվականի հունվարին խորտակված Costa Concordia զբոսանավի նավապետ Ֆրանչեսկո Սկետինոն դատապարտվել է 16 տարվա բանտարկության: Ինչպես հաղորդում է «Արմենպրես»-ը, այս որոշումը փետրվարի 11-ին ընդունել է առաջին ատյանի դատարանը՝ ավարտելով Իտալիայի Գրոսետո քաղաքում գրեթե երեք տարի տևած դատավարությունը:

Սկետինոն մեղավոր է ճանաչվել 32 մարդու չկանխամտածված սպանության մեջ, որոնք զոհվել են նավի խորտակման հետևանքով, ինչպես նաև այն բանում, որ լքել է նավը նախքան դրա վրա եղած բոլոր մարդկանց տարհանումն ավարտել է:

Բացի այդ, դատարանը նախկին նավապետին դատապարտել է նյութական խոշոր փոխհատուցում վճարելու մեծ խումբ ուղևորների և հսկայական տուգանքներ՝ մի շարք պետական հաստատությունների ու կազմակերպությունների:

Ինչպես նշում է ՏԱՍՍ-ը, Սկետինոյի փաստաբանները փորձում էին ապացուցել, որ մարդկանց զոհվելու պատճառ է դարձել ոչ թե վթարի բուն փաստը, այլ զբոսանավի անվտանգության համակարգի անսարքությունը:

Սկետինոն ինքը մեղադրյալի իր վերջին խոսքում հայտարարել է, թե ինքը «տնտեսական շահերի զոհ» է դարձել, և դատարանի առաջ պետք է կանգներ ոչ թե միայն ինքը, այլ մի ամբողջ «կազմակերպություն», որը չէր պահպանում անվտանգության նորմերը:

Իտալիայի դատախազությունը Ֆրանչեսկո Սկետինոյի համար պահանջում էր 26 տարվա բանտարկություն: Դատախազների մեղադրական ճառն ընդհանուր առմամբ տևել է ավելի քան 11 ժամ: Մեղադրողների կարծիքով՝ տեղի ունեցածի համար մեղավոր է բացառապես Սկետինոն, որը ոչ միայն չի կարողացել ապահովել իրեն վստահված մարդկանց անվտանգտությունը, այլև ստեղծել է բոլոր պայմանները աղետի համար: Ընդ որում դատախազ Ալեսանդրո Լեոպիցին նշել է, որ զբոսանավը սարքին վիճակում է եղել, իսկ աղետը հրահրել են Սկետինոյի ոչ պրոֆեսինոալիզմը և սխալը, ով ճիշտ չի գնահատել երթուղու կորդինատները: