Աշխարհի արձագանքը «նորմանդական քառյակի» Մինսկի գագաթնաժողովի արդյունքներին

Մինսկում «նորմանդական քառյակի» երկրների ղեկավարների բանակցություններում ձեռք բերված համաձայնությունները «Եվրոպայի համար մեծ թեթևացում են»: Այդ մասին, ամփոփելով գագաթնաժողովի արդյունքները, հայտարարել է Ֆրանսիայի նախագահ Ֆրանսուա Օլանդը, տեղեկացնում է «Արմենպրես»-ը:

«Դա լուրջ հույս է,- ասել է Օլանդը:- Դա մեծ թեթևացում է Եվրոպայի համար»:

Դրա հետ մեկտեղ Ֆրանսիայի ղեկավարը նշել է, որ դեռ պետք է աշխատանք տարվի ձեռք բերված համաձայնությունները կյանքի կոչելու համար: Ֆրանսիան և Գերմանիան կհետևեն այդ պայմանավորվածությունների կատարմանը, հավելել է Ֆրանսիայի նախագահը:

Իտալիայի վարչապետ Մատեո Ռենցին Մինսկի բանակցությունների արդյունքը գնահատել է «գերազանց»: «Պետք է սպասել Օլանդի ժամանմանը»,- ասել է նա՝ նշելով, որ բանակցությունների արդյունքը հիմք է տալիս հավատալու, որ «գերազանց արդյունք է ձեռք բերվել»:

Եվրախորհրդարանի նախագահ Մարտին Շուլցը հայտարարել է, որ ողջունում է Ուկրաինայում կրակի դադարեցման վերաբերյալ Մինսկում համաձայնության ձեռքբերումը: «Ողջունում եմ Ֆրանսիայի նախագահ Ֆրանսուա Օլանդի և Գերմանիայի կանցլեր Անգելա Մերկելի միջնորդությամբ կրակի դադարեցման վերաբերյալ համաձայնությունը, որը ձեռք է բերվել Ուկրաինային նվիրված Մինսկի բանակցություններում: Այժմ բոլոր կողմերը պետք է այն կատարեն, խոսքը գործի վերածեն»,- ասել է Շուլցը:

Գերմանիայի կանցլեր Անգելա Մերկելը Մինսկում կայացած մամուլի ասուլիսիում հայտարարել է, որ «նորմանդական քառյակի» ղեկավարներն Ուկրաինայի իրադրության կարգավորման պատրանքներ չունեն, բայց առկա է իրադրությունը դեպի լավը փոխելու իրական հնարավորություն:

«Մենք համաձայնություն ենք ձեռք բերել փետրվարի 15-ի զրո ժամից կրակի դադարեցման շուրջ: Մենք ոչ մի պատրանք չունենք, մենք հասկանում ենք, որ դեռ շատ-շատ աշխատանք է անհրաժեշտ անել: Բայց առկա է իրադրության բարելավման իրական հնարավորություն»,- ասել է նա լրագրողներին:

Ինչպես նշում է ՏԱՍՍ-ը, Բելառուսի նախագահ Ալեքսանդր Լուկաշենկոն կարծիք է հայտնել, որ ներկայումս գլխավորը Մինսկում ձեռք բերված համաձայնությունների իրագործումն է:

Նրա խոսքով՝ «պատերազմի և խաղաղության հարցերը լուծվում են ամիսներով և տարիներով, իսկ այստեղ հաջողվեց 15 ժամվա ընթացքում համաձայնության գալ հրադադարի շուրջ»: «Բայց գլխավորն առջևում է, տեսնենք, թե ինչ կլինի»,- ասել է Բելառուսի ղեկավարը: