Վրաստանի ԱԳՆ-ն ողջունել է Մինսկում ձեռք բերված համաձայնությունը

Վրաստանի արտաքին գործերի նախարարությունը ողջունում է Մինսկում կայացած բանակցությունների արդյունքները և հուսով է, որ ուկրաինական ճգնաժամը կկարգավորվի խաղաղ ճանապարհով: Այդ մասին, ինչպես տեղեկացնում է «Արմենպրես»-ը՝ հղում անելով «Նովոստի Գրուզիա»-ին, Վրաստանի արտաքին քաղաքական գերատեսչության ղեկավար Թամարա Բերուչաշվիլին հայտարարել է Ռումինիայի իր պաշտոնակից Բոգդան Աուրեսկուի հետ փետրվարի 13-ին Թբիլիսիում անցկացված համատեղ մամուլի ասուլիսում:

«Բնականաբար, մենք ողջունում ենք Մինսկի բանակցությունների արդյունքները և հույս հայտնում, որ այդ գործընթացն անշրջելի կլինի: Մենք նաև հույս ենք հայտնում, որ, ի տարբերություն հրադադարի վերաբերյալ 2008 թվականի վեցկետանոց համաձայնագրի, Ռուսաստանը կկատարի բոլոր այն պարտավորությունները, որոնք նշված են այդ համաձայնագրում և լիովին կհարգի միջազգային իրավունքի հիմնարար նորմերն ու սկզբունքները»,- հավելել է Բերուչաշվիլին: