Դավիթ Սակվարելիձեն համաձայնել է գլխավորել Ուկրաինայի հակակոռուպցիոն բյուրոն

Վրաստանի գլխավոր դատախազի նախկին տեղակալ (Սահակաշվիլիի պաշտոնավարման օրոք), խորհրդարանի պատգամավոր Դավիթ Սակվարելիձեն անուղղակիորեն հաստատել է, որ համաձայնել է գլխավորել Ուկրաինայի հակակոռուպցիոն բյուրոն: Ըստ ուկրաինական մի շարք լրատվամիջոցների տեղեկատվության՝ այդ պաշտոնից ավելի վաղ հրաժարվել էր Վրաստանի նախկին նախագահ Միխեիլ Սահակաշվիլին, հաղորդում է «Արմենպրես»-ը:

Ոչ պաշտոնական տեղեկատվության համաձայն՝ նոր պաշտոնում Սակվարելիձեի տեղակալները կլինեն Վրաստանի արդարադատության նախկին նախարար Զուրաբ Ադեիշվիլին և Գիզո Ուգլավան: Նաև հայտնի է, որ Սակվարելիձեն արդեն խնդրագիր է ներկայացրել իրեն Ուկրաինայի քաղաքացիություն տալու մասին:

«Թանկագիններս, երկար խորհրդածություններից և քննարկումներից հետո ես մեր թիմի հետ միասին որոշում եմ ընդունել համաձայնել ընկերներիս ու գործընկերներիս խնդրանքին, և ընդգրկվել այն ինստիտուտների կառուցման գործում, որոնք Ուկրաինայում պայքարում են կոռուպցիայի դեմ»,- փետրվարի 13-ին Facebook-ի իր էջում գրել է Սակվարելիձեն:

«Շատերի համար սա, հավանաբար, անհասկանալի որոշում է, շատերի համար էլ՝ ուրախալի և ընդունելի… Անկեղծ եմ ասում՝ կարծում եմ, որ իմ այս քայլը կապված է պայքարի ավելի ակտիվ փուլի անցնելու հետ: Այս անգամ արդեն Ուկրաինայում…Վրաստանի և Ուկրաինայի ճակատի ընդհանուր գիծը չի ներառում միայն Աբխազիան, Սամաչաբլոն, Դոնեցկը, Լուգանսկը և Ղրիմը:

Ստանալով ուկրաինացի գործընկերներիս առաջարկը՝ ես որոշեցի միանալ պայքարի ոչ պակաս կարևոր ուղղությանը՝ Ուկրաինայում կոռուպցիայի դեմ անզիջում պայքարին: Ես մեր թիմի հետ միասին կաշխատեմ առավելագույն ջանքեր գործադրել Ուկրաինայում հանուն արդար և հանրային շահերի պայքարող ինստիտուտների ձևավորման համար»,-իր մեկնաբանության մեջ նշել է Սակվարելիձեն:

Ինչպես նշում է «նովոստի Գրուզիա»-ն, ավելի վաղ ՈՒկրաինայի կառավարության կազմում նշանակվել են Վրաստանի նախկին իշխանությունների մի քանի ներկայացուցիչներ, որոնք ներկայացնում են Միխեիլ Սահակաշվիլիի գլխավորած «Միասնական ազգային շարժում» կուսակցությունը: