Թուրքիան քրդական խնդիրը ցանկանում է լուծել այն բարձրացրած PKK-ին վերացնելու միջոցով

Թուրքիան երկրում առկա քրդական խնդիրը ցանկանում է լուծել այն 25 տարի առաջ բարձրացրած և քրդերի անկախության համար պայքարող Քուրդիստանի աշխատավորական կուսակցությունը (PKK) վերացնելու միջոցով:

Ինչպես հաղորդում է «Արմենպրես»-ը` վկայակոչելով թուրքական ԶԼՄ-ները, Թուրքիայի վարչապետ Ահմեթ Դավութօղլուն հայտարարել է, որ Անկարան ցանկանում է լուծել քրդական խնդիրը, սակայն, դրա համար պետք է PKK-ի բոլոր մարտիկները լքեն երկիրը:

Նրա խոսքով, Թուրքիան քրդական խնդրի դեմոկրատական լուծումը դարձրել է իր առաջնություններից մեկը, սակայն, երկրի ներսում և նրա սահմաններից դուրս ուժեր կան, որոնք չեն ցանկանում, որ խնդիրը լուծվի:

Թուրքիայում քրդական խնդիրը լուծելու հետ կապված, այսպես կոչված, «դեմոկրատական գործընթացը» հայտարարվել է երեք տարի առաջ, որն իր մեջ ներառում է նաև PKK-ի զենքի վայր դնելու և երկրից հեռանալու պահանջ:

Անկարան մինչ այժմ հայտարարություններից բացի որևէ այլ գործնական քայլ քրդական խնդիրը լուծելու ուղղությամբ չի կատարել: PKK-ի առաջնորդները հայտարարել են, որ մինչև չտեսնեն քրդական խնդրի լուծում, այն է՝ Թուրքիայի սահմաններում Քրդական ինքնավարության ստեղծում, իրենք կազմակերպության զինված թևը դուրս չեն բերի երկրից, որը հանդիսանում է խնդրի կարգավորման գլխավոր երաշխիքը:

Քրդական խնդրի շուրջ Թուրքիայի զինված ուժերի և թուրքաբնակ քրդերի միջև բախումներում մինչ այժմ 40 հազար մարդ է զոհվել, իսկ Թուրքիան վերջին 25 տարիներին մոտ 50 մլրդ դոլար է կորցրել: