Իվանիշվիլին լարիի փոխարժեքի անկումը բացատրել է արտաքին գործոններով

Վրաստանի նախկին վարչապետ, միլիարդատեր և «Վրացական երազանք» քաղաքական կոալիցիայի հիմնադիր Բիձինա Իվանիշվիլին այն կարծիքին է, որ ազգային արժույթի՝ լարիի փոխարժեքի հետ կապված գործընթացների վրա ազդում են «արտաքին գործոնները», և դա վրացական լարիի «սովորական արձագանքն» է գործընթացներին, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

Լարիի փոխարժեքը, որը երկար ժամանակ պահպանվում էր մեկ դոլարի դիմաց 1,74-1,76 լարիի նշագծին, սկսել է անկում ապրել 2014 թվականի նոյեմբերի վերջից: Ներկայումս Վրաստանի Ազգային բանկի կողմից լարիի փոխարժեքը սահմանված է մեկ դոլարի դիմաց 2,0306 լարիի չափով:

«Մեր տնտեսությունը շատ թույլ է, 10-15 անգամ փոքր Եվրոպայի զարգացած երկրների տնտեսությունից: Թույլ տնտեսության պայմաններում ազգային արժույթի վրա ազդում է ցանկացած արտաքին գործոն. ես նկատի ունեմ տարածաշրջանում տիրող սուր իրադրությունը»,- նշել է Իվանիշվիլին:

Նա թվարկել է մի շարք հիմնական բացասական գործոններ, այդ թվում՝ «գլոբալ տնտեսության մեջ դոլարի փոխարժեքի աճը, Ուկրաինայի և Ռուսաստանի բարդ իրադրությունը, համապատասխանաբար վրացական արտահանման կրճատումը և այն միջոցների ծավալի նվազումը, որոնք արտարժույթով արտասահմանից Վրաստան են փոխանցվում վրացի հայրենակիցների կողմից»: Նաև, Իվանիշվիլիի խոսքով, կրճատվել է զբոսաշրջությունը, ինչի վրա նույնպես ազդել է տնտեսական անկումը տարածաշրջանում, թեև զբոսաշրջիկների հոսքը նվազել է ոչ միայն այդ պատճառով: «Եվ երկրորդ, կարծում եմ, ժամանակին սխալ թույլ տվեց արտաքին գործերի նախարարությունը, որն առանց կշռադատելու շատ երկրների հետ խստացրեց այցագրային ռեժիմը…»,- հավելել է Իվանիշվիլին «Կվիրիս պալիտրա» թերթին տված հարցազրույցում, որի ամբողջական տարբերակը հրապարակվելու է փետրվարի 16-ին: