Իտալացիներն ավելի քան 2 հազար գաղթականի են փրկել Լամպեդուզա կղզու մոտ

Իտալիայի առափնյա պահպանության ծառայությունը փրկել է 2164 գաղթականի, որոնք փորձում էին Լիբիայից հասնել Լամպեդուզա կղզի, հաղորդում է «Արմենպրես»-ը՝ հղում անելով France-Presse գործակալությանը: Գաղթականները դեպի Իտալիայի ափեր էին մեկնել մի քանի մակույկներով: Շուրջ 520 մարդու հասցրել են իտալական ռազմանավ, ևս 900 հոգու‚ նստեցրել են մաքսավորների և առափնյա պահպանության ծառայության նավակներ, մնացածներին տեղավորել են մի քանի այլ նավում:

Անցյալ շաբաթ հայտնի է դարձել Իտալիայի ափերի մոտ տեղի ունեցած ողբերգության մասին. մի քանի նավաբեկությունների հետևանքով անհայտ կորել է 300 մարդ, որոնցից ամենակրտսերը եղել է 12 տարեկան: Նրանք բոլորը մի քանի փչովի մակույկներով Լիբիայից դեպի Իտալիայի ափեր էին ուղևորվել ամենակարճ երթուղիով:

Ինչպես նշում է ՌԻԱ Նովոստին՝ վկայակոչելով գաղթականների գործերով ՄԱԿ-ի գլխավոր կոմիսարի վարչության տվյալները, 2014 թվականին համանման եղանակով փորձել են Միջերկրական ծովն անցնել առնվազն 218 հազար անօրինական միգրանտներ և գաղթականներ: Ենթադրվում է, որ այս միտումը կշարունակվի նաև 2015 թվականին: