Ուկրաինայի ուժայինները և աշխարհազորը ձեռնամուխ կլինեն ծանր ռազմական տեխնիկայի հետքաշմանը

Փետրվարի 16-ին Դոնբասում սկսվում է Մինսկի պայմանավորվածությունների իրականացման հերթական փուլը, որը նախատեսում է սպառազինությունների ծանր տեսակների հետքաշումը, տեղեկացնում է «Արմենպրես»-ը:

Երկու շաբաթվա ընթացքում հակամարտության շրջանում պետք է ստեղծվի անվտանգության գոտի: Այդ նպատակով միմյանցից առնվազն 50 կիլոմետր հեռավորության վրա պետք է հետ քաշվեն 100 միլիմետր տրամաչափով հրետանային համակարգերը, 70 կիլոմետր հեռավորության վրա՝ համազարկային կրակի հրթիռային համակարգերը և 140 կիլոմետր հեռավորության վրա՝ «Տոռնադո-Ս», «Ուրագան», «Սմերչ» համակարգերը, ինչպես նաև «Տոչկա» տակտիկական հրթիռային համակարգերը: Ընդսմին կողմերը պայմանավորվել են, որ ուկրաինացի ուժայինները ծանր սպառազինությունները հետ կքաշեն շ փման փաստական գծից, իսկ Դոնեցկի և Լուգանսկի ինքնահռչակ ժողովրդական հանրապետությունների զինված կազմավորումները՝ շփման այն գծից, որը արձանագրվել է Մինսկի անցյալ տարվա սեպտեմբերի 19-ի հուշագրով:

Լույս փետրվարի 15-ի գիշերը կողմերը, ինչպես որ պայմանավորվել էին, հայտարարել են հրադադարի մասին: ԴԺՀ-ում և ԼԺՀ-ում, ինչպես նաև Ուկրաինայի ազգային անվտանգության և պաշտպանության խորհրդում օրվա ընթացքում հաստատել են ծանր տեխնիկայի հետքաշմանը ձեռնամուխ լինելու մտադրությունը՝ ուշադրություն դարձնելով այն բանի վրա, որ դա կանեն միայն հակառակ կողմի համապատասխան քայլերից հետո:

ՌԴ-ի նախագահ Վլադիմիր Պուտինը, Ֆրանսիայի նախագահ Ֆրանսուա Օլանդը, Գերմանիայի կանցլեր Անգելա Մերկելը և Ուկրաինայի նախագահ Պյոտր Պորոշենկոն փետրվարի 15-ին կայացած հեռախոսազրույցի ընթացքում քննարկել են Ուկրաինայի հարավ-արևելքի իրադրության խաղաղ կարգավորման վերաբերյալ Շփման խմբի մասնակիցների կողմից փետրվարի 12-ին ստորագրված Համալիր միջոցառումների իրագործումը:

Ինչպես հաղորդել է Կրեմլի մամուլի ծառայությունը, նրանք արծարծել են Դեբալցևոյի շրջանում ստեղծված բարդ իրադրության հարցերը, ինչպես նաև ԵԱՀԿ-ի առաքելության դերն անդորրի ռեժիմի կատարման նկատմամբ հսկողության գործընթացում:

Իր հերթին, ինչպես նշում է ՏԱՍՍ-ը, ԵԱՀԿ-ի հատուկ մոնիթորինգային առաքելության ղեկավար Մայքլ Բոցյուրկիվը հայտնել է, որ Ուկրաինայի արևելքում դիտորդների թվաքանակը կհասցվի 350-ի: Բացի այդ, հրադադարի պայմանների կատարմանը հետևելու համար կազմակերպությունը «պլանավորում է օգտագործել անօդաչու թռչող սարքեր և արբանյակային տեխնոլոգիաներ»: