Գվինեան, Լիբերիան և Սիեռա Լեոնեն միջազգային օգնություն են խնդրել Էբոլայի դեմ պայքարելու համար

Գվինեան, Լիբերիան և Սիեռա Լեոնեն մտադիր են 2 ամիս հետո վերջ դնել Էբոլա վիրուսի հարուցած հիվանդությամբ վարակումներին: Այս մասին, ինչպես տեղեկացնում է «Արմենպրես»-ը, ասված է Արևմտյան Աֆրիկայի երեք պետությունների ղեկավարների՝ Ալֆա Քոնդեի, Էլեն Ջոնսոն Սեռլիֆի և Էռնեստ Բեյ Քորոմայի համատեղ հայտարարության մեջ, որոնք փետրվարի 15-ին հանդիպում են անցկացրել Գվինեայի մայրաքաղաք Կոնակրիում: Նրանք դիմել են միջազգային հանրակցությանը՝ իրենց երկրներին «այդ նպատակին հասնելու համար անհրաժեշտ օգնություն» ցույց տալու խնդրանքով:

Չնայած Էբոլա վիրուսի դեմ պայքարում համաշխարհային հանրակցության գործադրած ջանքերին, 2014 թվականի մարտ ամսից համաճարակի սկսվելուց ի վեր Գվինեայում, Լիբերիայում և Սիեռա Լեոնեում ընդհանուր առմամբ մահացել է ավելի քան 9,2 հազար մարդ, շուրջ 23 հազարը վարակվել են: Համաճարակի տարածման տեմպերի որոշ նվազումից հետո ընթացիկ տարում կրկին նկատվել է հիվանդության դեպքերի թվի աճ, առաջին հերթին Գվինեայում, նշել է Առողջապահության համաշխարհային կազմակերպությունը:

Համաշխարհային բանկի տվյալների համաձայն՝ մահացու վտանգավոր հիվանդության համաճարակն ընթացիկ տարում կարող է Սահարայից հարավ ընկած երկրների տնտեսություններին հասցնել 6,2 միլիարդ դոլարի վնաս, հաղորդել է ՏԱՍՍ-ը: