Ղազախստանը ձգտում է այս տարի գործընկերության համաձայնագիր ստորագրել ԵՄ-ի հետ

Ղազախստանի արտաքին գործերի նախարար Եռլան Իդրիսովը հուսով է, որ 2015 թվականին հանրապետությունը կստորագրի ԵՄ-ի հետ գործընկերության համաձայնագիրը և կանդամակցի Առևտրի համաշխարհային կազմակերպությանը (ԱՀԿ): Այդ մասին, ինչպես տեղեկացնում է «Արմենպրես»-ը, նա փետրվարի 16-ին հայտարարել է հանրապետության խորհրդարանի Մաժիլիսի (ստորին պալատ) «կառավարական ժամի» ընթացքում: «Մենք հուսով ենք, որ այս տարի երկու գործընթացները կավարտվեն»,- ընդգծել է նա:

«Եվրոպական միության 28 անդամ պետությունների շրջանակներում համաձայնեցման բարդ բյուրոկրատական գործընթացից հետո մեզ կհաջողվի ստորագրել այդ համաձայնագիրը և դրա վրա կոնկրետ աշխատանք սկսել»,- նշել է Իդրիսովը՝ հիշեցնելով, որ այս տարվա հունվարի 20-ին ԵՄ-ի հետ նախաստորագրվել է այս փաստաթղթի տեքստը:

Ըստ ՏԱՍՍ-ի հաղորդման՝ նախարարն ասել է, թե իրենք նաև ԱՀԿ մտնելու հույս ունեն: «ԱՀԿ-ն ունի ոչ միայն տնտեսական, այլև ավելի շատ քաղաքական նշանակություն: Այն գլոբալ տնտեսական հարաբերությունների բալանսիր է: ԱՀԿ-ի միջոցով մենք մուտք կապահովենք համաշխարհային առևտրի ճյուղավորված համակարգ և նրա ստանդարտներ, նորմեր ու կանոններ: Մեզ համար ԱՀԿ-ն աճելու կետ է: Ղազախստանը հետևողականորեն աշխատում է այդ ուղղությամբ»,- ամփոփել է ԱԳ նախարարը: