«Կասպերսկու լաբորատորիան» ամերիկյան լրտեսական վիրուս է հայտնաբերել

ԱՄՆ-ի Ազգային անվտանգության գործակալությունը կարողացել է լրտեսական ծրագրային ապահովումը թաքցնել կոշտ սկավառակների այն գոտիներում, որոնք պաշտպանված են ջնջումից և ֆորմատավորումից: Խոսքը վերաբերում է խոշորագույն արտադրողների սկավառակներին, ինչը հատուկ ծառայությանը տեսականորեն թույլ է տալիս աննկատ ընթերցել աշխարհում օգտագործվող համակարգիչների մեծ մասի տվյալները, հաղորդում է «Արմենպրես»-ը՝ հղում անելով Reuters-ին:

Լրտեսական նոր ծրագրերը հայտնաբերել է Ռուսաստանի «Կասպերսկու լաբորատորիան»: Հակավիրուսներ մշակողը պնդում է, որ նման մեթոդով ախտահարված համակարգիչներ է հայտնաբերել 30 երկրներում: Այդ ցուցակում առաջին տեղում նա նշել է Իրանը, այնուհետև Ռուսաստանը, Պակիստանը, Աֆղանստանը, Չինաստանը, Մալին, Սիրիան, Եմենը և Ալժիրը:

Լրտեսման թիրախները, ինչպես ճշտել է լաբորատորիան, եղել են կառավարական և ռազմական հիմնարկությունները, հեռահաղորդակցական և էներգետիկական ընկերությունները, բանկերը, ատոմային հետազոտական կենտրոնները, զանգվածային լրատվամիջոցները և իսլամական ակտիվիստները: Թեև լրտեսության նախաձեռնողները կարող էին տեխնիկապես ստանալ բազմաթիվ համակարգիչներ մուտք գործելու հնարավորություն, իրականում նրանք ընտրել են սահմանափակ քանակությամբ «զոհերի»՝ նրանց, որոնցով իրենք անմիջականորեն հետաքրքրվել են:

Ֆիրման ուղղակիորեն չի նշել, թե հատկապես որ երկիրն է պատասխանատու նման լրտեսության համար, սակայն ճշտել է, որ դա սերտորեն կապված է Stuxnet վիրուսի հետ, որն Ազգային անվտանգության գործակալության պատվերով օգտագործվել է Իրանի ուրանի հարստացման գործարանի վրա գրոհելու համար:

Ինչպես նշում են հետազոտողները, համակարգիչներում ներդրվող ծրագրի հանդեպ խոցելի են գործնականում ամբողջ շուկան ընդգրկող ավելի քան մեկ տասնյակ առաջատար ընկերությունների կոշտ սկավառակները: Խոսքը վերաբերում է այնպիսի հայտնի առևտրանիշերի, ինչպիսիք են Western Digital-ը, Seagate Technology-ն, Toshiba-ն, IBM-ն, Micron Technology-ն և Samsung Electronics-ը: