Ավստրալիայի խանութներից առգրավվում են սառեցրած հատապտուղները, որոնք տարածում են հեպատիտ А

Ավստրալիայի մթերային խանութների վաճառասեղաններից արագորեն առգրավվում են սառեցրած հատապտուղները, որոնք դարձել են հեպատիտ А-ով մարդկանց հիվանդացության պատճառ: Այս մասին հայտնել է ՏԱՍՍ-ը` հղում անելով երկրի առողջապահության նախարարությանը:

Երկրում գրանցվել է հեպատիտ А-ով վարակման արդեն 9 դեպք: Ընդ որում, միանգամից երեք նահանգներում՝ 4 մարդ հիվանդացել է Քվինսլենդում, 2-ը՝ Նոր Հարավային Ուելսում, և 3 մարդ՝ Վիկտորիա նահանգում:

Բժիշկներին հաջողվել է բավականին արագ պարզել, որ այս բոլոր վարակված մարդիկ կերել են Վիկտորիա նահանգում գտնվող «Փետիս ֆուդս» ընկերության սառեցված հատապտուղները:

Ընկերությունը մթերքի միայն տեղական դիստրիբյուտորն է. պտուղները աճեցվում ու սառեցվում են Չիլիում, իսկ փաթեթավորվում են Չինաստանում: