Սաակաշվիլին հայտարարել է Վրաստանում իշխանության վերադառնալու մտադրության մասին

Վրաստանի նախկին նախագահ Միխեիլ Սաակաշվիլին, որը գտնվում է Ուկրաինայում, հայտարարել է, թե մտադիր է իր զինակիցների հետ միասին վերադառնալ հայրենիք և հաղթել խորհրդարանական ընտրություններում: Այդ մասին, ինչպես տեղեկացնում է «Արմենպրես»-ը, նա հայտարարել է «Ռուսթավի-2» հեռուստաընկերությանը տված հարցազրույցում:

Այդպիսով, ինչպես նշում է ՏԱՍՍ-ը, պետության նախկին ղեկավարը հերքել է մի շարք ԶԼՄ-ների ու քաղաքական գործիչների այն պնդումները, որ նա ու իր զինակիցները մտադիր են հեղաշրջում իրականացնել Վրաստանում: «Մենք իշխանության կվերադառնանք ընտրությունների ճանապարհով»,- ասել է Սաակաշվիլին:

Նրա խոսքով՝ «այն, ինչ այսօր տեղի է ունենում Վրաստանում, աղետ է»: «Ներկայիս իշխանությունները երկիրը հասցրել են աղքատության»,- նշել է նախկին նախագահը: Գործող իշխանությունների անհաջողությունները նա բացատրել է դեպի Ռուսաստան նրանց կողմնորոշմամբ: Մինչդեռ, Սաակաշվիլին վստահ է, որ Վրաստանի ապագան մեծապես կախված է այն բանից, թե ինչ տեղի կունենա Ուկրաինայում:

Ավելի վաղ Վրաստանի նախկին վարչապետ Բիձինա Իվանիշվիլին վստահություն է հայտնել, որ նախկին նախագահ Միխեիլ Սաակաշվիլիի «Միասնական ազգային շարժում» կուսակցությունը չի կարողանա վերադառնալ իշխանության: Իվանիշվիլին այս կերպ է մեկնաբանել լրատվամիջոցներում տարածված այն վարկածը, թե գարնանը Սաակաշվիլին անկարգություններ է պլանավորում Վրաստանում:

«Ցանկանում եմ հանգստացնել Վրաստանի բնակչությանը. «Ազգային շարժումը» դրա համար անհրաժեշտ ռեսուրս չունի: Ոչ ոք չի կասկածում, որ նրանք անկարգություններ հրահրելու ցանկություն ունեն և նման փորձեր են ձեռնարկելու… Աստված մի արասցե, որ անկարգություններ սկսվեն, բայց նույնիսկ այդ դեպքում «ազգայինները» հնարավորություն չունեն գալու իշխանության: Վրաց ժողովուրդն այնքան հիմար չէ, ինչպես նրանք են կարծում, որ երկրորդ անգամ Սաակաշվիլիին իր գլխին նստեցնի. դրա համար նույնիսկ տեսական հնարավորություն չկա»,- հայտարարել է Իվանիշվիլին: