Ռուսաստանը միջոցներ կձեռնարկի, եթե Վրաստանին ՆԱՏՕ «ներքաշելու» փորձեր լինեն. Լավրով

Ռուսաստանը պատրաստ է համապատասխան միջոցներ ձեռնարկել, եթե ՆԱՏՕ-ն գործնական քայլեր սկսի Վրաստանին դաշինքի մեջ «ներքաշելու» ուղղությամբ: Այդ մասին, ինչպես տեղեկացնում է «Արմենպրես»-ը՝ հղում անելով ՌԻԱ Նովոստիին, հայտարարել է ՌԴ-ի արտաքին գործերի նախարար Սերգեյ Լավրովը:

«Մենք քննարկեցինք մեր փոխգործակցությունը միջազգային ասպարեզում, ներառյալ Ռուսաստանի և Հարավային Օսիայի պատվիրակությունների մասնակցությունն Անդրկովկասի կայունությանն ու անվտանգությանը նվիրված Ժնևի բանակցություններին: Մենք հաստատեցինք ուժի չկիրառման մասին իրավաբանորեն պարտավորեցնող պայմանավորվածություններ կնքելու անհրաժեշտությունը, որոնք կբացառեին 2008 թվականի իրադարձությունների կրկնվելը»,- ասել է նա փետրվարի 18-ին Մոսկվայում կայացած մամուլի ասուլիսում, որը նվիրված էր Հարավային Օսիայի ԱԳ նախարար Դավիդ Սանակոևի հետ բանակցությունների արդյունքներին:

Լավրովի խոսքով՝ «այդ խնդիրը հատկապես հրատապ է ՆԱՏՕ Թբիլիսիին ներքաշելու չդադարող գործընթացի լույսով»: «Մենք միասնական էինք այն հարցում, որ դա չի նպաստի Անդրկովկասում կայունության ապահովման ջանքերին, և, բնականաբար, միասնական կլինենք, եթե այդ քայլերն սկսեն գործնական ուրվագծեր ստանալ: Դատելով ըստ ամենայնի՝ դա արդեն սկսում է տեղի ունենալ, ուստի միջոցներ կձեռնարկենք՝ թույլ չտալու, որ այդ գործընթացները բացասական ազդեցություն ունենան իրադրության վրա»,- ընդգծել է ռուսաստանցի նախարարը:

Ինչպես արդեն հաղորդվել է, ՌԴ-ի և Հարավային Օսիայի ԱԳ նախարարներ Սերգեյ Լավրովը և Դավիդ Սանակոևը փետրվարի 18-ին Մոսկվայում պայմանագիր են ստորագրել պետական սահմանի մասին: Այդ կապակցությամբ ՌԴ ԱԳ նախարարությունում նշել են, որ պայմանագրի ստորագրումը կարևոր քայլ է միջպետական հարաբերությունների իրավական-պայմանագրային բազայի ձևավորման գործում: Գերատեսչությունում հույս են հայտնել, որ «այն վերջ կդնի վերջին ժամանակներս վրացական կողմի տարածած այն զրպարտություններին, թե իբր պատրաստվում է Հարավային Օսիայի «բռնակցում», «կլանում», «միացում»: ՌԴ-ի ԱԳ նախարարությունում հավելել են, որ Հարավային Օսիայի, ինչպես և Աբխազիայի հետ Ռուսաստանի հարաբերությունները եղել և մնում են իրավահավասար բարեկամ պետությունների, փոխշահավետ, փոխհարգալից գործընկերություն: