Մոտ ապագայում ՆԱՏՕ-ին Վրաստանի անդամակցությունը օրակարգի հարց չէ. Աբաշիձե

Ե՛վ Բրյուսելում, և՛ Մոսկվայում, և՛ Թբիլիսիում լավ գիտեն, որ մոտ ապագայում ՆԱՏՕ-ին Վրաստանի անդամակցությունը օրակարգի հարց չէ: Այդ մասին, ինչպես տեղեկացնում է «Արմենպրես»-ը՝ հղում անելով «Նովոստի Գրուզիա»-ին, փետրվարի 19-ին հայտարարել է Վրաստանի վարչապետի՝ Ռուսաստանի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեն:

«Եվ Բրյուսելում, և Մոսկվայում, և Թբիլիսիում լավ գիտեն, որ այսօր կամ վաղը ՆԱՏՕ-ին Վրաստանի միանալու հարցը դրված չէ օրակարգում»,- ասել է Աբաշիձեն: Դրա հետ մեկտեղ նա նշել է, որ Վրաստանն ազատ է ընտրելու այն կազմակերպությունը, որի հետ ցանկանում է համագործակցել:

«Վրաստանն անկախ երկիր է, ուստի նա լիակատար իրավունք ունի համագործակցելու ցանկացած միջազգային կազմակերպության, այդ թվում՝ ՆԱՏՕ-ի հետ… Այդ համագործակցությունը ոչ մի կերպ ուղղված չէ այն բանին, որ Վրաստանում տեղակայվի ՆԱՏՕ-ի ենթակառուցվածքը»,- հավելել է Աբաշիձեն:

ՌԴ-ի արտաքին գործերի նախարար Սերգեյ Լավրովը նախօրյակին ամփոփելով Հարավային Օսիայի ԱԳ նախարար Դավիդ Սանակոևի հետ Մոսկվյաում կայացած բանակցությունների արդյունքները, հայտարարել է, որ Ռուսաստանը պատրաստ է համապատասխան միջոցներ ձեռնարկել, եթե ՆԱՏՕ-ն գործնական քայլեր սկսի Վրաստանին դաշինքի մեջ «ներքաշելու» ուղղությամբ:

«Մենք քննարկեցինք մեր փոխգործակցությունը միջազգային ասպարեզում, ներառյալ Ռուսաստանի և Հարավային Օսիայի պատվիրակությունների մասնակցությունն Անդրկովկասի կայունությանն ու անվտանգությանը նվիրված Ժնևի բանակցություններին: Մենք հաստատեցինք ուժի չկիրառման մասին իրավաբանորեն պարտավորեցնող պայմանավորվածություններ կնքելու անհրաժեշտությունը, որոնք կբացառեին 2008 թվականի իրադարձությունների կրկնվելը»,- ասել է նա:

Լավրովի խոսքով՝ «այդ խնդիրը հատկապես հրատապ է ՆԱՏՕ Թբիլիսիին ներքաշելու չդադարող գործընթացի լույսով»: «Մենք միասնական էինք այն հարցում, որ դա չի նպաստի Անդրկովկասում կայունության ապահովման ջանքերին, և, բնականաբար, միասնական կլինենք, եթե այդ քայլերն սկսեն գործնական ուրվագծեր ստանալ: Դատելով ըստ ամենայնի, դա արդեն սկսում է տեղի ունենալ, ուստի միջոցներ կձեռնարկենք՝ թույլ չտալու, որ այդ գործընթացները բացասական ազդեցություն ունենան իրադրության վրա»,- ընդգծել է ռուսաստանցի նախարարը: