Երկրի վրա 100 տոննա զանգվածով տիեզերական աղբի «անձրև» է տեղացել. NASA

Անցյալ տարի շարքից դուրս եկած ավելի քան 600 արբանյակ, հրթիռների բանեցված աստիճան և տիեզերական ապարատի այլ բեկորներ են լիովին կամ մասնակի այրվել մթնոլորտի խիտ շերտերում՝ դեպի Երկիր հետադարձ ճանապարհին: Ինչպես տեղեկացնում է «Արմենպրես»-ը՝ հղում անելով ամերիկյան Space News շաբաթահանդեսին, այս տվյալները NASA-ն ներկայացրել է ՄԱԿ-ի Խաղաղ նպատակներով տիեզերական տարածության օգտագործման կոմիտեին, որը քննարկել է «տիեզերական աղբի մաքրման» հիմնախնդիրը:

Մասնագետների գնահատումներով՝ անցյալ տարի «տիեզերքից աղբային անձրևը» սովորականից ավելի ուժեղ է եղել Արեգակի բարձր ակտիվության պատճառով, որը բարձրացրել է Երկրի մթնոլորտի սահմանը և հարկադրել է դեպի մոլորակի մակերևույթ սլանալու ցածր ուղեծրերում մնացած տիեզերական հնոտիի մի մասը: Ամերիկացի փորձագետները կարծում են, որ «մետաղական տեղումների» ընդհանուր զանգվածը գերազանցել է 100 տոննան: Հնարավոր չէ պարզել՝ արդյոք շատ բեկորներ են հասել Երկիր՝ չվնասվելով մթնոլորտի խիտ շերտերով անցնելիս, բայց փոխարենը հայտնի է, որ մարդկանցից ոչ ոք դրանից չի տուժել:

NASA-ի աշխատակիցներն ասում են, որ դրանից հետո տիեզերքը փոքր-ինչ մաքրվել է: Նրանց խոսքով՝ 10 սանտիմետրից ոչ փոքր չափով առարկաների քանակը, որոնք մտնում են տիեզերական աղբի կատալոգի մեջ, նվազել է: Միևնույն ժամանակ իրենց դարն ապրած արբանյակների և տանող հրթիռների բեկորների ընդհանուր զանգվածը, որոնք պտտվում են ուղեծրում, վերջին 10 տարում 5 հազար տոննայից աճել է մինչև 6,7 հազար տոննա:

Ինչպես նշում է ՏԱՍՍ-ը, մասնագետներն այժմ առաջարկում են ընդհանուր տիեզերական տան մաքրման տարբեր եղանակներ՝ ընդհուպ մինչև ամենաէկզոտիկը՝ հատուկ ուղեծրային «փոշեկուլների» ստեղծումը: Միևնույն ժամանակ բոլորն էլ համակարծիք են, որ գլխավորը բոլոր երկրների կողմից տիեզերական ապարատների օգտագործման կանոնների խստիվ կատարումն է: