Ցուցարարները զրուցում են, փոխանակվում են կարծիքներով (ուղիղ միացում)

01.01

Այս պահի դրությամբ Բաղրամյան պողոտայում իրավիճակը հանգիստ է: Ցուցարարները զրուցում են, փոխանակվում են կարծիքներով:

00.15

Բաղրամյան պողոտայում է նաև Ազգային անվտանգության նախկին պետ Դավիթ Շահնազարյանը, ով կարծում է, որ ցույցի արդյունքները իսկապես աննախադեպ են և քաղաքական մթնոլորտը փոխվել է: 

23.59

Բաղրամյան պողոտայում է Ազգային ժողովի պատգամավոր Հրանտ Բագրատյանը, ով զրուցում է ցուցարարների հետ: 

23.25

Բաղրամյան պողոտայում շարունակվում է նստացույցը: Վալերի Օսիպյանը բարձրախոսով զգուշացրեց ցուցարարներին, որ նրանք ժամը 23:00-ից հետո, իրավունք չունեն աղմկելու և արգելեց օգտագործել բարձրախոսներ:

22.10

Թեպետ ոստիկանությունը հորդորոց երաժշտություն չմիացնել, սակայն այս պահին Բաղրամյան պողոտայում հնչում է բարձր երաժշտություն: Մարդիկ պարում և ուրախանում են:

21.25

Բաղրամյան պողոտայում ցուցարարների շարքերում հարբած մարդիկ կան: Այս մասին հայտարարեց ՀՀ փոխոստիկանապետ Հունան Պողոսյանը'իրավապահների մի մեծ խմբով շրջելով ցուցարարների շարքերում: Պողոսյանը «Ժառանգություն» կուսակցության խոսնակ Դավիթ Սանասարյանի հետ առանձնազրույցում նշեց, որ անհրաժեշտ է հեռացնել ալկոհոլ օգտագործած անձանց: Դավիթ Սանասարյան էլ իր հերթին խնդրեց փոխոստիկանապետին ցույց տալ նրանց, և պատրաստակամություն հայտնեց օգնել ոստիկանությանը ալկոհոլ օգտագործած մարդկանց ցուցարարների շարքերից հեռացնելու հարցում:

21.10

ՀՀ փոխոստիկանապետ Հունան Պողոսյանի հորդորով ոստիկանները, սակայն, նահանջեցին հետ: Մինչ այդ Երևանի փոխոստիկանապետ Վալերի Օսիպյանը ևս մեկ անգամ հորդորեց բարիկադ ծառայող աղբարկղերի վրա բարձրախոսներ չտեղադրել:

20.50

Ակտիվիստ Դավիթ Սանասարյանը բանակցում է Հունան Պողոսյանի հետ, իսկ ցուցարարները ի հեճուկս ոստիկանության բարձր երաժշտություն են միացրել: Բաղրամյան պողոտոայում շարունակում է իրավիճակը լարված մնալ:

20.40

Այս պահին Բաղրամյան պողոտայում իրավիճակը թեժացել է: Այստեղ է նաև ոստիկանապետ Վլադիմիր Գասպարյանը:

Ոստիկանության աշխատակիցները մոտեցել են ցուցարարներին և փորձում են հեռացնել տեխնիկան:

20.05

Երևանի փոխոստիկանապետ Վալերի Օսիպյանն արգելում է Բաղրամյան պողոտայում օգտագործել բարձրախոսներ և այլ տեխնիկա: Նա քաղաքացիներին հորդորոց հեռացնել պողոտայից ողջ տեխնիկան: Ի պատասխան Վալերի Օսիպյանի հորդորին` քաղաքացիները բացականչեցին. «հե´ռա´ցի´ր, հե´ռա´ցի´ր», «ազատ, անկախ, Հայաստան»:

19.00

Բաղրամյան պողոտայում ցուցարարներից երկու երիտասարդ հացադուլ են հայտարարել՝ Հարություն Հարությունյանն ու Հայկ Պարիկյանը։

18.10

Բաղրամյան պողոտայում Երևանի փոխոստիկանապետ Վալերի Օսիպյանը արգելեց բարձրախոսներ տեղադրել:

18.00

Գյումրու Թատերական հրապարակում էլեկտրաէներգիայի սակագնի բարձրացման դեմ բողոքի ակցիաներն այս պահին ավարտված են:

«Գյումրին անցած օրերի ընթացքում ևս մեկ անգամ ապացուցեց, որ ունի լավ երիտասարդություն՝ պայքարող ու տոկուն, ավելին, ձևավորվեց պայքարի մի նոր մշակույթ»,-նշել է ակտիվիստներից Արմեն Ներսիսյանը:

17.06

«Ոչ թալանին» նախաձեռնությունը Բաղրամյան պողոտայում քննարկումներ էր սկսել վերջին երկու օրը բողոքի ակցիաների ղեկն իրենց ձեռքը վերցրած մի քանի քաղաքացիների հետ: Քննարկումը, որի օրակարգի մասին ոչ ոք չէր ցանկանում հստակ տեղեկատվություն տրամադրել, ընդհատումներով կայացավ երեք տարբեր հատվածներում: Վերջինից հետո նախաձեռնության անդամները գնացին' նշելով, որ դեռևս ոչինչ հստակեցված չէ: Ակցի այի մասնակից Սուրեն Սահակյանը, ով ևս մասնակցում էր քննարկմանը, ենթադրություն արեց, որ «Ոչ թալանին» նախաձեռնության անդամները կարող են միանալ իրենց որպես քաղաքացիներ: Նա նշեց, որ քննարկումներ են գնում որոշումների կայացման մեխանիզմները հաստատելու ուղղությամբ: «Այսինքն' ոնց անել, որ հավաքված բազմության մեծամասնության կարծիքը ի հայտ գա»,-ասաց նա:

15.54

Այստեղ ենք սկսել ու էնքան կմնանք մինչև պայքարի վերջին հասնենք: Այս մասին այսօր Բաղրամյան պողոտայում հայտնել է ցուցարարներից մեկը:

15.53

«Հայազն»-ի անդամը հերքում է պահանջում Ժիրայր Սէֆիլյանից.

13.24

«Ոչ թալանին» նախաձեռնության անդամները կոչ են անում լուսավոր պայքարը կեղտոտելու փորձ չանել:

13.10

Անընդհատ լինել տարածքում բարդ էր, իսկ միայն փողոց փակելով խնդիր չենք լուծելու: Այս մասին այսօր լրագրողների հետ զրույցում ասաց «Ոչ թալանին» նաաձեռնության անդամ Սոֆիա Հովսեփյանը:

«Մեզ պետք էր մասնագետների օգնությունը, որ հասկանայինք, այն մանիպուլացիան, որ երկրի ղեկավարն արեց, պետք էր հասկանալ, ինչ կտա աուդիտը և այլն:

Առավել մանրամասն` այստեղ:

12.45

Քիչ առաջ մեկնարկել է «Ոչ թալանին» նախաձեռնության ասուլիսը:

«Աստված չանի իշխանություններն աուդիտը փորձեն վերածել իմիտացիայի, Աստված չանի խաբեություն տեղի ունենա: Որովհետև արդեն ոչ միայն Բաղրամյան պողոտան, այլ մի 3-4 փողոց միաժամանակ տարբեր կողմերից կփակվեն»,- ասաց նա:

Առավել մանրամասն` այստեղ:

12.00

Մեկնարկել է «Ոչ թալանին» նախաձեռնության ասուլիսը:

10.35

Երևանի փոխոստիկանապետը հորդորում է ցուցարարներին` «վեր կենալ, գնալ»:

10.14

Վալերի Օսիպյանը Բաղրամյան պողոտայում մահակ է փնտրում:

09.51

Ոստիկանապետ Վլադիմիր Գասպարյանը` դիմելով «Նոյեմբերի 5»-ի գործով ազատազրկված Շանթ Հարությունյանի որդուն` Շահեն Հարությունյանին` «ձգվի, ամուր եղի, խելառությունդ պահիր չափի մեջ, հա՞ բալես»:

«Դու շատ լավ հասկանում ես ամեն ինչ, դու խելացի տղա ես: Աստված պահապան ձեզ»,- ասաց Գասպարյանը:

09.45

Հայաստանի ոստիկանապետ Վլադիմիր Գասպարյանն ասում է, թե ոստիկանությունը չի պատրաստվում «կոտրել» երիտասարդ ցուցարարների ոգին և ցրել էլեկտրաէներգիայի թանկացման դեմ Բաղրամյան պողոտայում շարունակվող նստացույցը:

08.15

Բաղրամյան պողոտայում ցուցարարները մաքրում են տարածքը:

05.30

Արտակարգ դեպք է գրանցվել Բաղրամյան պողոտայում. «ՎԱԶ 2121» մակնիշի 11 AL 112 համարանիշներով ավտոմեքենայի վարորդը կայանել է այն պողոտայի սկզբնամասում և իր ուղևորների հետ դուրս եկել մեքենայից։ Ինչպես ավելի ուշ նշել են հենց իրենք, վարորդը և նրան ուղեկցող երկու կանայք եղել են ալկոհոլի ազդեցության տակ։ Կանանցից մեկը սեռական հայհոյանքներ է հնչեցրել իրենց գոռգոռոցների վրա մոտեցած լրագրողներին, ոստիկաններին և ցուցարարներին, որոշ ժամանակ անց նրա մոտ նկատվել է ինքնազգացողության վատացում, կանչվել է շտապօգնություն։ Իրարանցումը շարունակվել է ևս մի քանի րոպե։ Այնուհետև դեպքի վայր է ժամանել ՃՈ սպա, ում ցուցումով նրանց կարգի են հրավիրել և հեռացրել պողոտայից։

Տեսանյութը (18+)՝ 1in.am–ի

04.00

Գիշերը բավական լարված է անցել Բաղրամյան պողոտայում։ Ինչպես արդեն հայտնել է ԼՈՒՐԵՐ.com–ը, Բաղրամյան պողոտա են եկել «Ոչ թալանին» նախաձեռնության անդամներն ու Ազատության հրապարակում նստացույցի մասնակցող քաղաքացիներ, որոնցից մի կին, ով ներկայացել է իբրև ազատամարտիկ, վիճաբանություն և լարված իրավիճակ է ստեղծել։

Ուղիղ միացում