Գեղարքունիքում սակավ տեղումները սպառնում են կարտոֆիլի բերքին

Տնտեսություն 2 Հուլիս, 2015 1:03

Գեղարքունիքի մարզի տնտեսություններում ցանված ավելի քան 15 հազար հեկտար կարտոֆիլի ցանքերը սակավ տեղումների պատճառով հետագա աճի ու զարգացման համար հայտնվել են աննպաստ պայմաններում: Հատկապես Վարդենիսի տարածքի որոշ համայնքներից ստացված ահազանգերի համաձայն' կարտոֆիլի ցանքերը տասնյակ ու հարյուրավոր հեկտարների վրա դեռ նոր են ծլարձակել կամ չեն ծլարձակել ու նորմալ աճի եւ զարգացման համար համապատասխան նախանշաններ ցույց չեն տալիս:

«Հատկապես այն տարածքները, որոնք ցանվել են մայիսի կեսերին կամ վերջերին, չորության պատճառով դեռ տեսանելի կենսունակություն չեն ցուցաբերում, ուստի ստիպված ենք վաղաժամ ոռոգել կարտոֆիլի ցանքերը անձրեւացման կամ այլ եղանակներով, որպեսզի կարողանանք օգնել բույսի հետագա աճին, այլապես հետո դժվար կլինի շտկել իրավիճակը»,-«Արմենպրես»-ի հետ զրույցում նշեցին հողօգտագործողները:

«Կարտոֆիլի ցանքերը խոնավացնելու մեթոդը տեսանելի արդյունք ապահովում է: Բնական է, որ կարտոֆիլը հիմնականում ցանվում է ջրովի տարածքներում, ոռոգվում մի քանի անգամ: Նվազ ծլունակությունը հիմնականում կապվում է խոնավության բացակայության հետ, եւ եթե առաջիկա մի քանի օրերին էլ չորությունը շարունակվի, միակ ելքը կմնա վաղաժամ ու համատարած ոռոգումը, որի հնարավորությունը բոլոր տեղերում առկա է ամբողջությամբ»,-հավաստեց Գեղարքունիքի մարզպետարանի աշխատակազմի գյուղատնտեսության եւ բնապահպանության վարչության պետ Վանիկ Հովհաննիսյանը:

Խոսրով Խլղաթյան