Վստահ եմ իմ թիմի, տղերքի վրա, կարծում եմ` լավ հանդես կգանք. Աբրահամ Խաշմանյանը` ԵԼ-ի շրջանակներում կայանալիք խաղի մասին

Հիանալի և արտակարգ տրամադրություն ունենք: Մեր թիմը թե' ֆիզիկապես, թե' հոգեպես լավ մակարդակի վրա է: Այս մասին հուլիսի 2-ին Հանրապետական մարզադաշտում կայանալիք ՈՒԵՖԱ-ի Եվրոպայի լիգայի որակավորման 1-ին փուլի «Ալաշկերտ»-«Սենթ Ջոհնսթոն» հանդիպմանն ընդառաջ լրագրողների հետ հանդիպմանը նշեց հայկական թիմի գլխավոր մարզիչ Աբրահամ Խաշմանյանը:

«Հիանալի, արտակարգ տրամադրություն ունենք: Մեր թիմը թե' ֆիզիկապես, թե' հոգեպես լավ մակարդակի վրա է: Չգիտենք` մրցակիցն ինչ մակարդակի վրա է: Ըստ տեսագրությունների` մակարդակը լավն է, չենք հանդիպել, որ համեմատություն անենք»,- ասաց մարզիչը:

ԼՈՒՐԵՐ.com-ի թղթակցի այն հարցին, թե արդյոք մարզիչը հավատո՞ւմ է մեր թիմի հաղթանակին և ի՞նչ արդյունք է կանխատեսում Խաշմանյանը նշեց. «Հավատում ենք, եթե չհավատանք, ի՞նչ գործ ունենք ֆուտբոլում, մասնավորապես՝ ես: Բնական է, որ խաղադաշտ ենք դուրս գալու միայն հաղթանակի համար: Պետք է փորձենք դարպասն անառիկ պահել, քանի որ երկու խաղ է և ցանկալի չէ, որ մենք մեր դաշտում գոլ բաց թողնենք»:

Եթե չհավատանք, ի՞նչ գործ ունենք ֆուտբոլում, մասնավորապես՝ ես: Բնական է, որ խաղադաշտ ենք դուրս գալու միայն հաղթանակի համար: Պետք է փորձենք դարպասն անառիկ պահել, քանի որ երկու խաղ է, ու ցանկալի չէ, որ մենք մեր դաշտում գոլ բաց թողնենք:

«Վերլուծել ենք մրցակցի թույլ և ուժեղ կողմերը: Մենք 15 օր ունեինք նախապատրաստվելու համար, որն օպտիմալ օգտագործեցինք: Չեմ կարծում, որ խնդիրներ լինեն: Վստահ եմ իմ թիմի, տղերքի վրա: Կարծում եմ` լավ հանդես կգանք»,- ասաց Խաշմանյանը:

Այն հարցին, թե ինչպե՞ս կգնահատի երեկ տեղի ունեցած «Փյունիկ»-«Ֆոլգորե» հանդիպումը, մարզիչը նշեց. «Երեկ տեղի ունեցած խաղի մասին ուղղակի կարող եմ կարծիք հայտնել, գնահատական տալը կոռեկտ չի լինի իմ կողմից: Ես իմ թիմը կարող եմ գնահատել, վերլուծել»:

Ասուլիսին խաղի մասին խոսեց նաև թիմի ավագ Վահագն Մինասյանը, ով ասաց. «Մեր թիմում լավ տրամադրություն և պատրաստվածություն կա, ամեն ինչ անելու ենք մեր երկրպագուներին ուրախացնելու համար: Միջազգային ֆուտբոլը կարոտել եմ: Վերջին անգամ 2010-ին եմ հանդես եկել: Թիմում լավ հոգեբանական վիճակ է, բոլորը հասկանում են խաղի կարևորությունը, բոլորն էլ շատ լավ պատրաստվում են, և ամենակարևորը, տրամադրված ենք: Աստված առաջ»: