Հուլիսյան գիշերային երկինքը լիալուսինը կլուսավորի երկու անգամ

Աստղագիտական առումով հուլիսը կառանձնանա առանձնահատուկ երևույթով՝ երկու լիալուսիններով, ինչը տեղի է ունենում ընդամենը մի քանի տարին մեկ: Այս մասին «Արմենպրես»-ին տեղեկացրեց Հայկական աստղագիտական ընկերության համանախագահ Արեգ Միքայելյանը: «Նման երևույթը հազվադեպ է նրանով, որ լիալուսինը քսանութ օրվա պարբերություն ունի, և որպեսզի մեկ ամսում երկու անգամ լիալուսին երևա, երևույթը պետք է դիտվի ամսվա առաջին և վերջին օրերը: Մոտավոր հաշվարկով նման երևույթի կրկնությունը հնարավոր է 28 ամիսը մեկ»,- ասաց Արեգ Միքայելյանը: Այս տարի կրկնակի լիալուսին առաջինը երևաց հուլիսի 2-ի գիշերը, իսկ երկրորդը' «Կապույտ լիալուսինը», կնկատվի հուլիսի 31-ին:

«Մեկ ամսում երկրորդ լիալուսինն անվանում են «Կապույտ լիալուսին»: Իրականում այդ ժամանակ լիալուսինը կապույտ չի, և այդ անվանումը ուղղակի բառախաղի և տառադարձման արդյունք է: Անկախ ամենից, նման երևույթը գիտական առումով ոչ մի առանձնահատուկ ազդեցություն չի թողնի երկրի վրա: Ուղղակի, ինչպես և միշտ, լիալուսնի դեպքում պետք է մի փոքր ավելի զգոն լինել», - նշեց Արեգ Միքայելյանը:

Ավանդության համաձայն' հուլիսյան լիալուսինը հին հնդկացիներն անվանել են «Արուների լիալուսին», քանի որ այդ ժամանակ արու եղջերուների մոտ սկսում էին աճել նոր եղջերուները: