«Եթե դուք ոսկեդար չգիտեք՝ կասկածելի հայ եք, որովհետև ձեր ինքնության հետ կապ չունեք». Տ. Նավասարդ արքեպիսկոպոս Կճոյան

Այսօր Հայ առաքելական սուրբ եկեղեցու Արարատյան հայրապետական թեմի դահլիճը լի էր ունկնդիրներով: Այստեղ էին հավաքվել տարբեր հետաքրքրությունների տեր անձինք՝ լսելու սպասված և բացառիկ դասախոսություն հայկական ոսկեդարի և հայոց գրերի մասին:

ԼՈւՐԵՐ.com-ի թղթակցի տեղեկացմամբ՝ ԱՀԹ առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանը Թարգմանչած տոնի առթիվ կազմակերպված դասախոսության ընթացքում խոսեց հայոց գրերի կարևորության և գրական արժեքի մասին:

Սրբազան հայրը պատմական ակնարկի տեսքով ներկայացրեց Հայոց ոսկեդարը:

«Եթե դուք ոսկեդար չգիտեք՝ կասկածելի հայ եք, որովհետև ձեր ինքնության հետ կապ չունեք: Ազգանունը հայկական է, հայերեն է խոսում, բայց արժեքների կրողը չէ, այդպես չի գործում և այդպես չի մտածում, ինչքանո՞վ է հայ, լիարժեք իմաստով՝ թերի: Մենք ոսկեդարի ժառանգներն ենք, բայց ինչքանով մենք հավատարիմ ենք, կապված ու լցված հայ ժառանգությամբ, այնքանով էլ որակական հայ ենք, ոչ թե միայն էթնոսով»,- ասաց սրբազան հայրը:

Դասախոսության ընթացքում նկատեց, որ նախքան գրերի ստեղծումը քրիստոնեությունն անհասկանալի է եղել ժողովրդական զանգվածներին: Բանավոր խոսքը բավարար չէր, և անհրաժեշտություն կար հայերեն թարգմանել «Աստվածաշունչ»-ը և քրիստոնեական գրականությունը՝ այդ կերպ քրիստոնեությունը հասու դարձնելով ամբողջ ժողովրդին: 

Դասախոսությանը ներկա էր նաև ՀՀ ՊՆ տեղեկատվության և հասարակայնության հետ կապերի վարչության պետ գեներալ-մայոր Վարդան Ավետիսյանը, ով խոսեց «Գիրը՝ որպես հայ բանաստեղծական արվեստի ձևավորման նախապայման» թեմայի շուրջ: