Շատ եմ ցավում. «Բայերի» գլխավոր մարզիչը ներողություն է խնդրել «Բորուսիայի» դեմ խաղն իր պատճառով ընդհատելու համար (տեսանյութ)

Լևերկուզենի «Բայերի» գլխավոր մարզիչ Ռոջեր Շմիդտը ներողություն է հայցել Գերմանիայի առաջնության 22-րդ տուրում «Բորուսիայի» (0:1) դեմ հանդիպմանն իր պահվածքի համար:

Հիշեցնենք, որ խաղի 65-րդ րոպեին գլխավոր մրցավար Ֆելիքս Ցվայերը դադարեցրել էր հանդիպումը: Մրցավարը հեռացրել է դաշտի տերերի մարզչին, սակայն վերջինս հրաժարվել էր հեռանալուց. արդյունքում մրցավարը դադարեցրել էր խաղը, որը վերսկսվել է մոտ տասը րոպե անց:

«Ես նման կերպ վարվելու իրավունք չունեի: Ցանկանում էի պարզել՝ ինչի համար է մրցավարն ինձ հեռացնում: Փորձեցի քննարկել դա նրա հետ, սակայն նա չարձագանքեց: Երբեմն ֆուտբոլում մարդիկ էմոցիաների ազդեցությամբ սխալ որոշումներ են կայացնում: Նման որոշում կայացրեցի նաև ես, ինչի արդյունքում տուժեց թիմը: Շատ եմ ցավում»,- մարզչի խոսքը մեջբերում է Goal-ը: